रत्नागिरी, 16 जानेवारी, (हिं. स.) | रत्नागिरी जिल्ह्यातील जिल्हा परिषद व पंचायत समितीच्या निवडणुकांसाठी जिल्हा प्रशासन सज्ज झाले आहे. जिल्ह्यातील 56 जिल्हा परिषद गट व 112 पंचायत समिती गणांसाठी निवडणूक होणार आहे. या संदर्भातला सविस्तर आढावा रत्नागिरीचे जिल्हाधिकारी मनुज जिंदल यांनी पत्रकार परिषदेमध्ये दिला.

मंडणगड तालुक्यात 20 जिल्हा परिषद गट व 4 पंचायत समिती गण, दापोली तालुक्यात 6 जिल्हा परिषद गट व 12 पंचायत समिती गण, खेड तालुक्यात 7 जिल्हा परिषद गट व 14 पंचायत समिती गण, चिपळूण तालुक्यात 9 जिल्हा परिषद गट व 18 पंचायत समिती गण, गुहागर तालुक्यात पाच जिल्हा परिषद गट व दहा पंचायत समिती गण, रत्नागिरी तालुक्यात दहा जिल्हा परिषद गट व 20 पंचायत समिती गण, संगमेश्वर तालुक्यात सात जिल्हा परिषद गट व 14 पंचायत समिती गण, लांजा तालुक्यात चार जिल्हा परिषद गट व आठ पंचायत समिती गण आणि राजापूर तालुक्यात सहा जिल्हा परिषद गट व 12 पंचायत समिती गण अशा या निवडणुका होणार आहेत.

या निवडणुकांसाठी एकूण 1693 मतदान केंद्र असतील. नियंत्रण कक्ष 2143 व बॅलेट युनिट 4286 असतील. आजपासून 21 जानेवारीपर्यंत सकाळी अकरा ते दुपारी तीन या वेळेत उमेदवारी अर्ज सादर करण्याची प्रक्रिया सुरू राहील. रविवारी, 18 जानेवारी रोजी सार्वजनिक सुट्टी असल्याने अर्ज सादर करता येणार नाहीत. अर्जांची छाननी 22 जानेवारी रोजी होईल. छाननी प्रक्रिया झाल्यानंतर अंतिम उमेदवारांची यादी 22 जानेवारी रोजी सादर करण्यात येईल. उमेदवारी अर्ज माघारी घेण्याची प्रक्रिया 23, 24 आणि 27 रोजी सुरू राहील. 25 व 26 रोजी सार्वजनिक सुट्टी असल्याने उमेदवारी अर्ज माघारी घेण्याची नोटीस स्वीकारली जाणार नाही. दिनांक 27 जानेवारी 2026 रोजी दुपारी साडेतीन वाजल्यानंतर निवडणूक लढवणाऱ्या उमेदवारांची यादी प्रसिद्ध करण्यात येईल व निशाणी वाटप करण्यात येईल. दिनांक 5 फेब्रुवारी रोजी सकाळी साडेसात ते सायंकाळी साडेपाच वाजेपर्यंत मतदानाचा दिवस असणार आहे. शनिवार दिनांक 7 फेब्रुवारी रोजी सकाळी दहा वाजल्यापासून मतमोजणी होणार आहे.

---------------

हिंदुस्थान समाचार / रत्नागिरी