सोलापूर, 19 जानेवारी (हिं.स.)।

महापालिका निकालाच्या दोन दिवसानंतर काँग्रेसच्या खासदार प्रणिती शिंदे यांनी मतदारांचे जाहीर आभार मानले. पक्षाच्या पदाधिकारी व कार्यकर्त्यांना भावनिक आवाहन करत बलाढ्य धनशक्ती, सत्तेचा दुरुपयोग, यंत्रणांचा गैरवापर आणि धार्मिक ध्रुवीकरणाच्या अंधारलेल्या वाटेवर या निवडणुकांना सामोरे गेलो, शेवटच्या क्षणापर्यंत लढलो, आपल्या सोलापूरच्या भल्यासाठी संघर्ष करत राहिलो असे म्हणत हा पराभव वेदनादायक असला तरी तो अंतिम नसल्याचे खासदार प्रणिती शिंदे यांनी स्पष्ट केले आहे.महानगरपालिका निवडणुकांचे निकाल आपल्या अपेक्षांप्रमाणे लागले नाहीत, हे सत्य आहे. अनेक महिन्यांची मेहनत, रस्त्या-रस्त्यांवर फिरून केलेला संघर्ष, लोकांपर्यंत पोचवलेला विचार आज आकड्यांमध्ये उतरला नाही, याची खंत प्रत्येकाच्या मनात आहे. राजकारणात जय-पराजय हे येत-जात असतात.मात्र कार्यकर्त्यांचा आत्मविश्वास, निष्ठा आणि प्रामाणिकपणा हीच खरी शिदोरी असते. तुम्ही प्रत्येकाने ज्या जिद्दीने, प्रामाणिकपणे आणि न डगमगता काम केले, ते कधीही हरलेले नसल्याचे खासदार शिंदे म्हणाल्या.

---------------

हिंदुस्थान समाचार / यशपाल गायकवाड