परभणी, 19 जानेवारी (हिं.स.) – महाराष्ट्र शासनाच्या कृषी विभागाच्या वतीने शेतकऱ्यांच्या ज्ञानवृद्धीसाठी व आधुनिक शेती तंत्रज्ञानाचा अभ्यास करण्याच्या उद्देशाने “शेतकरी परदेश अभ्यास दौरा योजना” राबविण्यात येत आहे. सन 2025-26 या वर्षात एकूण तीन परदेश अभ्यास दौरे नियोजित असून त्यामध्ये युरोप, इस्राएल तसेच मलेशिया, व्हिएतनाम व फिलिपाईन्सचा समावेश आहे.
या योजनेअंतर्गत मलेशिया, व्हिएतनाम आणि फिलिपाईन्ससाठीचा अभ्यास दौरा नुकताच रवाना झाला आहे. सहभागी शेतकऱ्यांनी पुणे येथून मुंबई मार्गे प्रवास सुरू केला. या दौऱ्यामध्ये राज्यातील 15 प्रगतशील शेतकरी, कृषी विभागाचा एक अधिकारी व एक प्रवासी कंपनीचा प्रतिनिधी सहभागी आहेत.
दौऱ्याच्या प्रारंभी कृषी मंत्री दत्तात्रय भरणे यांनी व्हिडिओ कॉलद्वारे सहभागी शेतकऱ्यांशी संवाद साधून त्यांना शुभेच्छा दिल्या. त्यांनी शेतकऱ्यांना आंतरराष्ट्रीय स्तरावरील आधुनिक शेती तंत्रज्ञानाचा अभ्यास करून तो अनुभव राज्यातील शेतकऱ्यांपर्यंत पोहोचवावा, असे आवाहन केले.
या अभ्यास दौऱ्यात शेतकऱ्यांना आधुनिक शेती पद्धती, संरक्षित शेती, कृषी प्रक्रिया उद्योग, निर्यातक्षम उत्पादन तंत्रज्ञान तसेच विविध देशांतील कृषी व्यवस्थापन व विपणन व्यवस्थेचा प्रत्यक्ष अनुभव घेण्याची संधी मिळणार आहे. या अनुभवाचा उपयोग राज्यातील शेती अधिक उत्पादनक्षम आणि शाश्वत करण्यासाठी होणार आहे.
विशेष म्हणजे सन 2019 नंतर हा पहिलाच परदेश अभ्यास दौरा असून, कृषी विभागाने ही महत्वाकांक्षी योजना पुन्हा प्रभावीपणे सुरू केली आहे. कृषी विभागाचा विश्वास आहे की, या उपक्रमामुळे शेतकऱ्यांना आंतरराष्ट्रीय शेती तंत्रज्ञानाची माहिती मिळेल आणि राज्यातील शेती विकासाला नवी दिशा मिळेल.
-----------------------
हिंदुस्थान समाचार / Chaitanya JayantRao Chitnis
