अकोला, 02 जानेवारी (हिं.स.)।भारतीय सैन्यदल, नौदल व वायुदलामध्ये अधिकारी पदावर भरती होण्यासाठी पात्र उमेदवारांना सर्व्हिस सिलेक्शन बोर्ड (एसएसबी) या परीक्षेची पूर्व तयारी करून घेणेसाठी छात्रपूर्व प्रशिक्षण केंद्र, नाशिक रोड, नाशिक येथे महाराष्ट्र शासनातर्फे महाराष्ट्रातील नवयुवक व युवतीसाठी दि. १९ जानेवारी ते ३ एप्रिल २०२६ या कालावधीत एसएसबी कोर्स क्र. ६६ आयोजित करण्यात येत आहे. सदर कोर्ससाठी प्रशिक्षणार्थीची निवास, भोजन आणि प्रशिक्षणाची निःशुल्क सोय करण्यात आली आहे..
जिल्हातील इच्छुक उमेदवारांनी सैन्य दलातील अधिकारी पदाची संधी उपभोगण्यासाठी जिल्हा सैनिक कल्याण कार्यालय, अकोला येथे दि. १३ जानेवारी २०२६ रोजी मुलाखतीस हजर रहावे. मुलाखतीस येतेवेळी उमेदवारांनी सैनिक कल्याण विभाग (डीएसडब्लू), पुणे यांची वेबसाईट www.mahasainik.maharashtra.gov.in या संकेत स्थळावर सर्च करून त्यामधील एसएसबी- ६६ कोर्सेसाठी किंवा व्हॉटस्अप क्र. ९१५६०७३३०६ वर संबंधित प्रवेश पत्र व परिशिष्टांची चेक लिस्ट यांचे अवलोकन करून त्याची दोन प्रतीमध्ये प्रिंट काढून (किंवा प्रिंट कार्यालयाकडून घ्यावी) ते पूर्ण भरून सोबत घेऊन यावे.
केंद्रामध्ये एस.एस.बी.कोर्समध्ये प्रवेश मिळण्यासाठी खाली नमुद कोणतीही एक पात्रता आवश्यक आहे व त्यासंबंधीचे पात्रता प्रमाणपत्र कोर्सला येतांना सोबत घेवून यावेत. कंम्बाईड डिफेन्स सर्व्हिसेस एक्झामिनेशन (सीडीएसई- युपीएससी) अथवा नॅशनल डिफेंस अॅकेडमी एक्झामिनेशन (एनडीए-युपीएससी) पास झालेली असावी व त्यासाठी सर्व्हिसेस सिलेक्शन बोर्ड मुलाखतीसाठी पात्र झालेले असावे. एनसीसी सी सर्टिफिकेट 'ए' किंवा 'बी' ग्रेड मध्ये पास झालेले असावेत व एनसीसी ग्रुप हेडक्वार्टरने एसएसबीसाठी शिफारस केलेली असावी. टेक्नीकल ग्रॅज्युएट कोर्ससाठी एस.एस.बी. मुलाखतीसाठी कॉल लेटर असावे. युर्निव्हर एन्ट्री स्किमसाठी एसएसबी कॉल लेटर असावे किंवा एसएसबीसाठी शिफारस केलेल्या यादीत नाव असावे. अधिक माहितीसाठी प्रभारी अधिकारी, छात्रपूर्व प्रशिक्षण केंद्र, नाशिक रोड, नाशिक यांचा ईमेल आईडी- training.pctcnashik@gmail.com व दूरध्वनी क्र. ०२५३-२४५१०३२ किंवा व्हॉटस्अप क्र. ९१५६०७३३०६ वर कार्यालयीन वेळेत प्रत्यक्ष अथवा दुरध्वनीवर संपर्क करावा, असे आवाहन (सेना मेडल) (निवृत्त) जिल्हा सैनिक कल्याण अधिकारी मेजर आनंद शरद पाथरकर यांनी केले आहे.
---------------
हिंदुस्थान समाचार / जयेश गावंडे
