लातूर, 20 जानेवारी (हिं.स.)। शेतातील बांधावरील झाडाच्या फांद्या तोडण्याच्या किरकोळ कारणावरून वाद उफाळून येत त्याचे रूप थेट हिंसक हल्ल्यात परिवर्तित झाल्याची गंभीर घटना औसा तालुका येथील गोंद्री शिवारात शनिवारी (दि. १०) सायंकाळी साडेचार वाजण्याच्या सुमारास घडली. या घटनेत तिघा आरोपींनी संगनमत करून एका शेतकऱ्याला काठी व कुऱ्हाडीच्या दांड्याने बेदम मारहाण केल्याने परिसरात भीतीचे वातावरण निर्माण झाले आहे. याबाबत मिळालेल्या माहितीनुसार, प्रल्हाद रघुनाथ भारती (वय ४८, रा. लोदगा) हे गोंद्री शिवारातील त्यांच्या शेतात नेहमीप्रमाणे काम करत होते. शेताच्या बांधावर वाढलेल्या झाडाच्या फांद्या शेतीच्या मशागतीस अडथळा ठरत असल्याने त्या कापत असताना आरोपी विठ्ठल चंचल भारती व त्याच्यासोबत असलेले अन्य दोघे तेथे आले. फांद्या का तोडतोस, असा जाब विचारत त्यांनी प्रल्हाद भारती यांच्याशी वाद घालण्यास सुरुवात केली.

वादाच्या दरम्यान आरोपींनी शिवीगाळ करत प्रल्हाद भारती यांना धक्काबुक्की केली. काही क्षणातच हा वाद अधिक उग्र होत तिघांनी मिळून संगनमताने हल्ला चढवला. काठी व कुऱ्हाडीच्या दांड्याने त्यांनी प्रल्हाद भारती यांच्या पायावर व पाठीवर सपासप वार केले. अचानक झालेल्या या हल्ल्यामुळे प्रल्हाद भारती खाली कोसळले असून ते गंभीर जखमी झाले. घटनेनंतर परिसरातील शेतकरी घटनास्थळी जमा झाले. जखमी अवस्थेत प्रल्हाद भारती यांना तातडीने उपचारासाठी रुग्णालयात दाखल करण्यात आले. या घटनेमुळे ग्रामीण भागातील शेतजमिनीच्या बांधावरून होणाऱ्या वादांचे पुन्हा एकदा विदारक स्वरूप समोर आले असून कायदा-सुव्यवस्थेचा प्रश्न ऐरणीवर आला आहे.

या प्रकरणी औसा पोलीस ठाण्यात प्रल्हाद भारती यांच्या फिर्यादीवरून आरोपी विठ्ठल चंचल भारती याच्यासह अन्य दोघांविरुद्ध भारतीय न्यायसंहितेतील संबंधित कलमान्वये गुन्हा दाखल करण्यात आला आहे. आरोपी हे सर्व लोदगा (ता. औसा) येथील रहिवासी असल्याचे पोलिसांकडून सांगण्यात आले आहे. दरम्यान, घटनेचा अधिक तपास औसा पोलीस करीत असून आरोपींच्या भूमिकेचा सखोल तपास केला जात आहे. शेताच्या बांधावरून होणाऱ्या वादांमुळे पुन्हा हिंसाचार होऊ नये यासाठी पोलिसांनी नागरिकांना संयम बाळगण्याचे आवाहन केले आहे.

---------------

हिंदुस्थान समाचार / Mahesh Madanrao Chitnis