छत्रपती संभाजीनगर, 20 जानेवारी (हिं.स.)।
भारतीय जनता पक्षाचे ज्येष्ठ नेते रावसाहेब दानवे यांच्या उपस्थितीत
छत्रपती संभाजीनगर येथे विभागीय भाजप कार्यालयात उमेदवारांच्या मुलाखती संपन्न झाल्या.
यासंदर्भात अधिक माहिती देताना रावसाहेब दानवे पाटील म्हणाले की,
नुकत्याच पार पडलेल्या महानगरपालिका निवडणुकांमध्ये भारतीय जनता पार्टीला मिळालेल्या घवघवीत यशानंतर संपूर्ण महाराष्ट्रात कार्यकर्त्यांमध्ये उत्साहाचे व नवचैतन्याचे वातावरण निर्माण झाले आहे. त्याच पार्श्वभूमीवर राज्यातील पंचायत समिती व जिल्हा परिषद निवडणुकांचे वेळापत्रक जाहीर होताच भाजपचे कार्यकर्ते व इच्छुक उमेदवार जोमाने कामाला लागले आहेत.
या अनुषंगाने छत्रपती संभाजीनगर येथील भारतीय जनता पार्टीच्या विभागीय कार्यालयात जिल्ह्यातील सर्व तालुक्यांतील इच्छुक उमेदवारांच्या मुलाखती मोठ्या उत्साहात व शिस्तबद्ध पद्धतीने घेण्यात आल्या. यावेळी अनेक उमेदवारांनी आत्मविश्वासाने आपली भूमिका मांडत आगामी निवडणुकांसाठी पूर्ण तयारी असल्याचे संकेत दिले.
या उमेदवार मुलाखती वेळी महाराष्ट्र राज्याचे कॅबिनेट मंत्रीअतुल सावे, माजी केंद्रीय अर्थमंत्री खासदार भागवत कराड, फुलंब्रीच्या आमदार सौ. अनुराधाताई चव्हाण, जिल्हाध्यक्ष सुहास शिरसाट, जालना येथील माजी आमदार कैलास गोरंट्याल यांच्यासह जिल्ह्यातील सर्व प्रमुख नेते, पदाधिकारी, बूथ प्रमुख, मंडळ अध्यक्ष तसेच असंख्य कार्यकर्ते उपस्थित होते.
या कार्यक्रमामुळे आगामी पंचायत समिती व जिल्हा परिषद निवडणुकांच्या पार्श्वभूमीवर भारतीय जनता पार्टी अधिक संघटित, अधिक सक्षम आणि अधिक निर्धाराने जनतेच्या सेवेसाठी सज्ज असल्याचा विश्वास सर्वत्र व्यक्त करण्यात आला.
---------------
हिंदुस्थान समाचार / Hanumant Madanrao Chitnis
