माध्यमांसमोर वक्तव्य टाळण्याचा पालकमंत्र्यांचा इशारा

सोलापूर, 20 जानेवारी (हिं.स.) : महापालिका निवडणुकीत अनेक अडचणींवर मात करत भाजपने ऐतिहासिक यश संपादन केले आहे. या पार्श्वभूमीवर भाजपने आपला जाहीरनामा प्रसिद्ध केला असून नगरसेवकांसाठी स्वतंत्र विकास आराखडा देण्यात येणार असल्याची माहिती पालकमंत्री जयकुमार गोरे यांनी दिली.

“आपण लोकांचे सेवक आहोत, या भावनेतूनच काम करावे,” असे सांगत येत्या काही दिवसांत महापौरांसह इतर पदांची निवड होणार असल्याचे त्यांनी स्पष्ट केले. मात्र या निवडीसंदर्भात कोणत्याही नगरसेवकाने माध्यमांसमोर वक्तव्य करू नये, अन्यथा कारवाई करण्यात येईल, असा सज्जड इशाराही त्यांनी दिला.

नुकत्याच झालेल्या महापालिका निवडणुकीत मिळालेल्या अभूतपूर्व यशानंतर हॉटेल बालाजी सरोवर येथे भाजपच्या ८७ नगरसेवकांचा सन्मान सोहळा आयोजित करण्यात आला होता. यावेळी सर्व नगरसेवकांना मोत्यांच्या माळा घालून गौरविण्यात आले.

या कार्यक्रमास आमदार सुभाष देशमुख, आमदार सचिन कल्याणशेट्टी, आमदार देवेंद्र कोठे, शहराध्यक्ष रोहिणी तडवळकर, माजी आमदार दिलीप माने, मनीष देशमुख यांच्यासह पक्षाचे पदाधिकारी व कार्यकर्ते मोठ्या संख्येने उपस्थित होते.

----------------------

हिंदुस्थान समाचार / यशपाल गायकवाड