सोलापूर, 06 जानेवारी (हिं.स.)। माढ्याचे खासदार धैर्यशील मोहिते पाटील यांना राष्ट्रवादी काँग्रेस शरदचंद्र पवार पक्षाने आता सोलापूर महापालिका निवडणूक प्रभारी म्हणून जबाबदारी दिली आहे. त्यानंतर पहिल्यांदाच त्यांनी माध्यमांशी संवाद साधला. सोलापूर शहरात देखील मोहिते पाटील यांना मानणारा मोठा वर्ग आहे. त्यामुळे बेरजेचे राजकारण करण्यासाठी मोहिते पाटील अकलूज पॅटर्न सोलापूर महापालिकेत राबवण्याचा प्रयत्न करतील, राष्ट्रवादी काँग्रेस शरदचंद्र पवार पक्षाकडून तसा प्लॅन आखला जात आहे. त्यानुसार धैर्यशील मोहिते पाटील यांनी काँग्रेस आणि शिवसेना उबाठा गटाशी चर्चा सुरू केली आहे. यात जर अजित पवारांच्या पक्षाकडूनही आघाडीचा प्रस्ताव आल्यास भाजपला रोखण्यासाठी त्यांनाही आघाडीत सोबत घेऊन सोलापुरात भाजपविरुद्ध आघाडी केली जाईल, असेही खासदार धैर्यशील मोहिते पाटील यांनी स्पष्ट केले.महापालिकेसाठी राष्ट्रवादी शरद पवार पक्षाकडून माढ्याचे खासदार धैर्यशील मोहिते पाटील यांच्यावर जबाबदारी सोपविण्यात आली असून मिशन सोलापूर महापालिका सुरू झाले आहे. सोलापूर महापालिकेसाठी महाविकास आघाडी एकत्र लढणार असून त्या संदर्भात चर्चा सुरू झाल्याचे खासदार धैर्यशील मोहिते पाटील यांनी सांगितले. सोलापूर महापालिकेसाठी जर अजित पवार यांच्या पक्षाकडून प्रस्ताव आल्यास त्यांनाही आघाडीत सामील करून घेतले जाणार असल्याचे त्यांनी सांगितले. याबाबत वरिष्ठांशी आणि स्थानिक पदाधिकाऱ्यांशी चर्चा करून अजितदादा पवारांच्यासोबत जाण्याबाबत निर्णय घेतला जाईल, असे त्यांनी म्हटले.

---------------

हिंदुस्थान समाचार / यशपाल गायकवाड