रायगड, 09 जानेवारी (हिं.स.)। क्षात्रैक्य समाज, अलिबाग या संस्थेच्या रौप्य महोत्सवी वर्षानिमित्त शनिवार १० जानेवारी २०२६ रोजी कुरूळ येथील संस्थेच्या सभागृहात भव्य अखंड भजन महोत्सवाचे आयोजन करण्यात आले आहे. स्व. प्रभाकर सदाशिव राणे यांच्या स्मृतिप्रीत्यर्थ आयोजित करण्यात आलेल्या या महोत्सवात तालुका व परिसरातील नामवंत भजन मंडळांचा सहभाग लाभणार आहे.

या भजन महोत्सवात एकूण दहा निमंत्रित भजन मंडळे सहभागी होणार असून भक्तिरसाने परिपूर्ण वातावरण निर्माण होणार आहे. कु. जागृती पाटील (वेलवली), जयवंत पाटील व संदीप पाटील (कुरूळ), प्रकाश नाईक (बेलकडे), चेतन पाटील (सहाण), भूषण माळवी व दयानंद भगत (आवास), समर्थ पाटील (वायशेत), नरेश कडू (वाडगाव), निलेश जंगम (वेश्वी) आणि नितीन पाटील (मापगाव) हे आपल्या भजन मंडळांसह सहभागी होणार आहेत.

महोत्सवाचे आणखी एक विशेष आकर्षण म्हणजे सुप्रसिद्ध भजन गायिका प्रणिता देशमुख (कर्जत) यांचे भक्तिरसपूर्ण सादरीकरण. तसेच सुप्रसिद्ध पखवाज वादक सुशांत पाटील हे आपल्या शिष्यवृंदासह पखवाज सहवादन सादर करणार आहेत. कार्यक्रमाच्या समारोपाला चक्री भजन जुगलबंदी होणार असून यामध्ये आदिनाथ सटले (आळंदी) आणि महेश कंठे (मुरबाड) हे दोन नामवंत भजन सम्राट रसिकांना मंत्रमुग्ध करणार आहेत.

या भजन महोत्सवाचा लाभ भजनप्रेमी व संगीत रसिकांनी मोठ्या संख्येने घ्यावा, असे आवाहन क्षात्रैक्य समाजाचे अध्यक्ष द्वारकानाथ वामन नाईक, सचिव प्रदीप कृष्णाजी नाईक तसेच भजन महोत्सव समिती प्रमुख ॲड. प्रसाद शांताराम पाटील यांनी केले आहे.

---------------

हिंदुस्थान समाचार / संदेश साळुंके