मुंबई, 09 जानेवारी (हिं.स.) - मध्य रेल्वे, मुंबई विभागात रविवार, दि. ११.०१.२०२६ रोजी विविध अभियांत्रिकी व देखभाल कामे करण्यासाठी खालीलप्रमाणे उपनगरीय विभागांवर मेगा ब्लॉक परिचालित करण्यात येणार आहे.
मुख्य मार्ग : छत्रपती शिवाजी महाराज टर्मिनस ते विद्याविहार दरम्यान अप व डाउन धीम्या मार्गावर १०.५५ ते १५.५५ वाजेपर्यंत
छत्रपती शिवाजी महाराज टर्मिनस येथून १०.४८ ते १५.४५ वाजेदरम्यान सुटणाऱ्या डाउन धीम्या मार्गावरील गाड्या छत्रपती शिवाजी महाराज टर्मिनस ते विद्याविहार स्थानकांदरम्यान डाउन जलद मार्गावर वळवण्यात येतील. या गाड्या भायखळा, परळ, दादर, माटुंगा, शीव व कुर्ला स्थानकांवर थांबतील व पुढे पुन्हा डाउन धीम्या मार्गावर वळवण्यात येतील.
घाटकोपर स्थानक येथून १०.१९ ते १५.५२ वाजेदरम्यान सुटणाऱ्या अप धीम्या मार्गावरील गाड्या विद्याविहार ते छत्रपती शिवाजी महाराज टर्मिनस दरम्यान अप जलद मार्गावर वळवण्यात येतील. या गाड्या कुर्ला, शीव, माटुंगा, दादर, परळ व भायखळा स्थानकांवर थांबतील.
ट्रान्स-हार्बर मार्ग:
ठाणे – वाशी / नेरूळ स्थानकांदरम्यान अप व डाउन ट्रान्स-हार्बर मार्गावर ११.१० ते १६.१० वाजेपर्यंत
ब्लॉक कालावधीत वाशी / नेरूळ आणि ठाणे स्थानकांदरम्यान अप व डाउन ट्रान्स-हार्बर मार्गावरील सेवा पूर्णतः रद्द राहतील.
ठाणे येथून १०.३५ ते १६.०७ वाजेपर्यंत वाशी / नेरूळ / पनवेलकडे जाणाऱ्या डाउन मार्गावरील गाड्या रद्द राहतील. तसेच पनवेल / नेरूळ / वाशी स्थानकांवरून ठाणेकडे १०.२५ ते १६.०९ वाजेपर्यंत जाणाऱ्या अप मार्गावरील गाड्या रद्द राहतील.
---------------
हिंदुस्थान समाचार / सुधांशू जोशी
