लातूर, 16 मार्च (हिं.स.) । अहमदपूर तालुक्यातील उजना येथील सिद्धी शुगर अँड अलाईड इंडस्ट्रीजच्या ऊस गळीत हंगाम २०२५-२६ च्या सांगता समारोहात राज्याचे सहकार मंत्री बाबासाहेब पाटील यांनी कारखान्याचे महत्त्व अधोरेखित केले. त्यांनी सांगितले की, हा कारखाना या भागातील शेतकऱ्यांच्या आर्थिक प्रगतीचा मुख्य केंद्र आहे.

कार्यक्रमाचे अध्यक्ष होते महाराष्ट्राचे माजी मंत्री बाळासाहेब जाधव, तर प्रमुख अतिथींमध्ये कारखान्याचे व्यवस्थापकीय संचालक अविनाश जाधव, अहमदपूर पंचायत समितीचे सभापती सुरज पाटील, कारखान्याचे व्हॉइस प्रेसिडेंट पी. जी. होनराव, तसेच शिवानंद हैंगणे, शिवाजीराव देशमुख, गोविंद पाटील, बापूराव सारोळे, सुंदर साखरे, हेमंत जाधव, नितीन पाटील, संजय कोटलवार, राजू भाई आंदोरीकर, सादिक शेख, पांडुरंग धडे आणि शिवाजी मरलापल्ले यांच्यासह अनेक मान्यवर उपस्थित होते.

सहकार मंत्री बाबासाहेब पाटील यांनी सांगितले की, “आपल्या साखर कारखान्याचा १४ वा गळीत हंगाम सर्वांच्या सहकार्यामुळे यशस्वीपणे पूर्ण झाला. अविनाश जाधव यांच्या नियोजनपूर्ण कामकाजामुळे हा हंगाम यशस्वी झाला.” त्यांनी दिवंगत उपमुख्यमंत्री अजितदादा पवार यांची आठवणही केली आणि सर्व कर्मचार्‍यांचे व शेतकऱ्यांचे आभार मानले.

कार्यक्रमात सर्वाधिक ऊस पुरवठा करणारे शेतकरी, उत्कृष्ट काम करणारे ऊस ठेकेदार आणि विविध विभागातील अधिकारी व कर्मचारी सहकार मंत्री बाबासाहेब पाटील यांच्या हस्ते गौरविण्यात आले. कारखान्याचे व्यवस्थापकीय संचालक अविनाश जाधव यांनी सांगितले की, यावर्षी कारखान्याच्या क्षमतेपेक्षा जास्त, म्हणजेच ५ लाख १२ हजार मेट्रिक टन उसाचे गाळप झाले. हे यश सर्वांच्या पाठबळामुळे शक्य झाले असून, भविष्यातही अशाच सहकार्याची अपेक्षा त्यांनी व्यक्त केली.---------------------

हिंदुस्थान समाचार / Mahesh Madanrao Chitnis