सोलापूर, 07 मार्च (हिं.स.)।

सोलापूर शहरात उन्हाचा कडाका दिवसेंदिवस वाढत चालला असून आज तापमानाने ३९.५° सेल्सिअसचा टप्पा ओलांडला आहे. विशेष म्हणजे, गेल्या ७२ तासांत तापमानाचा आलेख सातत्याने वर जात असल्याने सोलापूरकर उन्हाने हैराण झाले आहेत.हवामान कार्यालय, सोलापूर यांनी दिलेल्या आकडेवारीनुसार आज कमाल तापमान ३९.५° से. (१०३.१° फॅ.) नोंदवले गेले. तर किमान तापमान १९.५° से. (६७.१° फॅ.) इतके होते. हवेतील आर्द्रता घटून २८% वर आल्यामुळे वातावरणात कोरडेपणा वाढला आहे, परिणामी उन्हाच्या झळा अधिक तीव्रतेने टोचत आहेत.गेल्या दोन दिवसांच्या तुलनेत आज उन्हाचा तडाखा जास्त असल्याने दुपारी १२ ते ४ या दरम्यान शहरातील मुख्य बाजारपेठा आणि रस्त्यांवर शुकशुकाट पाहायला मिळाला. वाढत्या उष्णतेमुळे शीतपेये, शहाळी आणि रसवंती गृहांवर नागरिकांची गर्दी वाढत आहे.हवामान विभागाचा अंदाज: येणाऱ्या २-३ दिवसांत तापमानाचा हा पारा ४०° सेल्सिअसचा टप्पा ओलांडण्याची शक्यता आहे. त्यामुळे नागरिकांनी दुपारच्या वेळी कामाशिवाय बाहेर पडू नये.

---------------

हिंदुस्थान समाचार / यशपाल गायकवाड