मुंबई, 10 एप्रिल (हिं.स.)। इंडियन इन्स्टिट्यूट ऑफ मॅनेजमेंट मुंबई (आयआयएम मुंबई) ११ एप्रिल रोजी एक ऐतिहासिक टप्पा गाठणार आहे, जेव्हा संस्थेची पहिली एमबीए बॅच पदवीधर होईल आणि एका नव्या वारशाची सुरुवात होईल. हा क्षण संस्थेच्या प्रवासातील एका नव्या अध्यायाची सुरुवात करतो, जो औद्योगिक अभियांत्रिकीमधील तिचा दीर्घकाळचा वारसा आयआयएम परिसंस्थेच्या शैक्षणिक सामर्थ्य आणि जागतिक प्रतिष्ठेशी जोडतो.

ही पहिली एमबीए बॅच संस्थेच्या नॅशनल इन्स्टिट्यूट ऑफ इंडस्ट्रियल इंजिनिअरिंग (NITIE) मधून आयआयएम मुंबईमध्ये झालेल्या स्थित्यंतराचा एक भाग आहे. गेल्या दोन वर्षांत, एक मजबूत शैक्षणिक अभ्यासक्रम पूर्ण करण्याव्यतिरिक्त, विद्यार्थ्यांनी संस्थेच्या विकसित होत असलेल्या संस्कृती आणि ओळखीचा अनुभव घेतला आहे आणि त्यात योगदानही दिले आहे.

या संदर्भात, आईआईएमचे डायरेक्टर प्रा. मनोज तिवारी म्हणाले, आमच्या प्रवासातील एका महत्त्वपूर्ण टप्प्यावर २०२६ च्या तुकडीने सातत्य आणि बदल या दोन्हींचा अनुभव घेतला आहे. व्यवस्थापन क्षेत्रात प्रवेश करत असलेल्या त्यांना आम्ही शुभेच्छा देतो, आणि ते आमची शैक्षणिक आदर्श मूल्ये स्थापित करण्यात व ती टिकवून ठेवण्यात महत्त्वपूर्ण भूमिका बजावतील. या संदर्भात, आम्ही पुढील पिढ्यांच्या विकासाला चालना देणाऱ्या आणि आंतरराष्ट्रीय स्तरावर भारताची प्रतिष्ठा लक्षणीयरीत्या वाढवणाऱ्या संस्थेमध्ये विकसित होण्यावर लक्ष केंद्रित करत आहोत.

यासोबतच, पहिल्या एमबीए तुकडीचा पदवीदान सोहळा व्यवस्थापन शिक्षणामध्ये आयआयएम मुंबईच्या वाढत्या भूमिकेवर शिक्कामोर्तब करतो.

आयआयएम मुंबई, जी पूर्वी एनआयटीआयई म्हणून ओळखली जात होती, ही १९६३ साली स्थापन झालेली एक प्रतिष्ठित संस्था आहे. भारताच्या एनआयआरएफ क्रमवारीत २०२५ मध्ये सहाव्या क्रमांकावर असलेली ही संस्था ऑपरेशन्स, सप्लाय चेन, सस्टेनेबिलिटी आणि जनरल मॅनेजमेंट या क्षेत्रांमध्ये उत्कृष्ट कामगिरी करत आहे. मुंबईसारख्या आर्थिक राजधानीत असल्यामुळे उद्योगजगताशी तिचा घनिष्ठ संबंध आहे, ज्यामुळे विद्यार्थ्यांना प्रत्यक्ष उद्योग अनुभव आणि संधी उपलब्ध होतात.

संस्थेमध्ये अत्याधुनिक पायाभूत सुविधा, जागतिक दर्जाचे ग्रंथालय आणि संशोधनासाठी अनुकूल वातावरण उपलब्ध आहे. तसेच, पंतप्रधान गती शक्ती राष्ट्रीय मास्टर प्लॅन अंतर्गत लॉजिस्टिक्स आणि सप्लाय चेन मॅनेजमेंटसाठी सेंटर ऑफ एक्सलन्स म्हणूनही आयआयएम मुंबई कार्यरत आहे. आंतरराष्ट्रीय विद्यार्थी आदान-प्रदान कार्यक्रम आणि संशोधनातील नवकल्पना यांच्या माध्यमातून ही संस्था भविष्यातील नेतृत्व घडवण्यात महत्त्वाची भूमिका बजावत आहे.

---------------

हिंदुस्थान समाचार / Suraj Chaugule