कोल्हापूर, 11 एप्रिल (हिं.स.) येथील छत्रपती प्रमिलाराजे (सीपीआर) शासकीय हॉस्पिटलमध्ये व्हेरिकोज वेन्स (पायांच्या शिरांच्या आजारावर) यशस्वी शस्त्रक्रिया करून रुग्णसेवेत आणखीन एक महत्त्वपूर्ण टप्पा गाठला आहे. उदय मनोहर कांबळे या रुग्णावर ही शस्त्रक्रिया करण्यात आली.
यापूर्वी आवश्यक यंत्रसामग्री उपलब्ध नसल्यामुळे अनेक रुग्णांना खाजगी रुग्णालयात जावे लागत होते. मात्र आता सीपीआरमध्ये आवश्यक यंत्रसामग्री उपलब्ध झाल्याने शासकीय स्तरावरच शस्त्रक्रिया करणे सुलभ झाले आहे . त्यामुळे रुग्णांमध्ये समाधानाचे वातावरण पसरले आहे.
डॉ. शुभम हिरेमठ यांनी या रुग्णावर वैयक्तिक लक्ष देत उपचार प्रक्रियेत महत्त्वाची भूमिका बजावली.
या यशस्वी शस्त्रक्रियेसाठी सर्जन डॉ. संजय देसाई, डॉ.स्वेनील शाह ,भूलतज्ज्ञ डॉ. तेजश्री महिंद आणि सर्जरी विभागातील डॉ. प्रणव यांचे मोलाचे योगदान लाभले.
या यशस्वी शस्त्रक्रियेमुळे भाविष्यात व्हेरिकोज वेन्सच्या रुग्णांना मोफत व दर्जेदार उपचार मिळणार आहेत .यामध्ये अधिष्ठाता डॉ. सदानंद भिसे यांचे महत्वपूर्ण योगदान आहे. लवकरच अत्याधुनिक यंत्रसामग्री उपलब्ध होणार असल्याने रुग्णसेवा अधिक सक्षम व व्यापक होईल.
सीपीआर शासकीय हॉस्पिटलमध्ये आता व्हेरिकोज वेन्स शस्त्रक्रिया नियमितपणे उपलब्ध झाली असून, गरजू रुग्णांनी या सुविधेचा लाभ घ्यावा, असे आवाहन रुग्णालयाच्यावतीने करण्यात आले.
---------------
हिंदुस्थान समाचार / VijayKumar Pandurang Powar
