नवी मुंबई, 18 एप्रिल (हिं.स.) - नवी मुंबई येथील जवाहरलाल नेहरू पोर्ट ट्रस्ट (जेएनपीटी) परिसरातील जेडब्ल्यूआर लॉजिस्टिक पार्कमध्ये आज, शनिवारी दुपारी भीषण स्फोटासह मोठी आग लागली. एका केमिकल प्लांटमध्ये झालेल्या या स्फोटामुळे परिसरात खळबळ उडाली. आगीची भीषणता इतकी मोठी आहे की धुराचे लोट कित्येक किलोमीटर अंतरावरूनही स्पष्टपणे दिसत आहेत. या केमिकल प्लांटमध्ये एका मागेमाग तीन स्फोट झाल्याची माहिती समोर येत आहे.

मुख्य अग्निशमन अधिकारी विजय राणे यांनी ही आग नियंत्रणात आणल्याची माहिती दिली. त्यांनी सांगितले की, दुपारी पावणे तीन वाजता आग लागल्याची माहिती मिळाली होती. आगीचे स्वरूप मोठे होते, आम्ही आग नियंत्रित केली आहे. केमिकल असल्यामुळे आग लागली होती. धोकादायक केमिकल आहे. यात जखमी कोणीही नाही. बऱ्यापैकी मटेरियल जळाले आहे. आग कंट्रोलमध्ये आहे, आग कुठेही पसरणारी नाही. कुलिंगचे काम करावे लागेल असं त्यांनी सांगितलं.

घटनेची माहिती मिळताच सिडको आणि जेएनपीटी अग्निशमन दलाच्या ७ ते ८ गाड्या तातडीने घटनास्थळी दाखल झाल्या आहेत. सुदैवाने, या घटनेत अद्याप कोणतीही जीवितहानी झाल्याचे वृत्त समोर आलेले नाही. मात्र, आगीची भीषणता पाहता मोठे आर्थिक नुकसान झाल्याचा प्राथमिक अंदाज व्यक्त केला जात आहे.

मिळालेल्या माहितीनुसार, संबंधित लॉजिस्टिक पार्कमधील एका केमिकल प्लांटमध्ये अचानक स्फोट झाला. यानंतर आगीने रौद्र रूप धारण केले आहे. याला लागून असलेल्या इतर दोन प्लांटमध्येही स्फोट झाले. या स्फोटांच्या आवाजाने संपूर्ण परिसर हादरून गेला असून भीतीपोटी कामगारांची मोठी पळापळ झाली. ज्या ठिकाणी ही आग लागली आहे, त्याच्या मागील बाजूस डोंगराळ भाग आहे. त्यामुळे ही आग तिथेही पसरण्याची भीती व्यक्त केली जात आहे. शिवाय आग लागलेल्या कंपनीच्या बाजूला ही इतर केमिकल कंपनी आहे. त्यामुळे या आगीचा धोका त्यांना ही निर्माण झाला आहे.

घटनेची माहिती मिळताच अग्निशमन दलाच्या 7 ते 8 गाड्या घटनास्थळी दाखल झाल्या आहेत. आणखी काही गाड्या त्या ठिकाणी रवाना झाल्याची माहिती आहे. परिसरात अनेक केमिकल कंपन्या असल्याने आग अधिक पसरू नये यासाठी प्रशासनाकडून युद्धपातळीवर प्रयत्न केले जात आहेत. या घटनेत अद्याप कोणतीही जीवितहानी झाल्याचे वृत्त समोर आलेले नाही, मात्र आगीची भीषणता पाहता मोठे आर्थिक नुकसान झाल्याचा अंदाज आहे. ज्या ठिकाणी आग लागली आहे, त्याच्या अगदी मागे डोंगर आहे. ही आग डोंगरापर्यंत पोहोचण्याची भीती व्यक्त केली जात आहे.

मदत कार्यात तिथे वेग आला आहे. आगीवर नियंत्रण मिळवण्यासाठी अग्निशमन दलाच्या गाड्या घटनास्थळी पोहोचल्या आहेत. केमिकल नक्की कोणते होते आणि स्फोटाचे नेमके कारण काय, याचा तपास सध्या सुरू आहे. आगीमुळे निर्माण झालेले काळ्या धुराचे लोट लांबूनही दिसत असल्याने नवी मुंबईकरांमध्ये चिंतेचे वातावरण आहे. जखमींबाबत अद्याप कोणतीही अधिकृत माहिती मिळालेली नाही. मात्र या प्लांटमध्ये झालेल्या एकापाठोपाठ एक स्फोटांमुळे परिसरातील नागरिकांमध्ये मोठी घबराट पसरली आहे. आगीचे लोट मोठ्या प्रमाणात पसरत असून डोंगराळ भागालाही या आगीची झळ बसण्याची शक्यता निर्माण झाली आहे.

---------------

हिंदुस्थान समाचार / सुधांशू जोशी