अमरावती, 18 एप्रिल, (हिं.स.) - अमरावती जिल्ह्यातील परतवाडा येथे सुरू असलेल्या संवेदनशील प्रकरणाच्या पार्श्वभूमीवर आता राज्य उत्पादन शुल्क विभागातील एका महिला कर्मचाऱ्याच्या मानसिक छळाचा गंभीर आरोप समोर आल्याने प्रशासनात खळबळ उडाली आहे. संबंधित महिला कर्मचाऱ्याने आपल्या वरिष्ठ अधिकाऱ्याविरोधात राजापेठ पोलीस ठाण्यात अधिकृत तक्रार दाखल केली असून या प्रकरणाने नवे वळण घेतले आहे.

तक्रारीनुसार, संबंधित वरिष्ठ अधिकाऱ्याकडून वारंवार अपमानास्पद वागणूक दिली जात होती. तसेच, तिच्या इच्छेविरुद्ध विविध कामांसाठी दबाव टाकण्यात येत असल्याचे नमूद करण्यात आले आहे. या सततच्या त्रासामुळे मानसिक तणाव वाढला असून कामाच्या ठिकाणी सुरक्षिततेचा अभाव जाणवत असल्याचा आरोप महिलेने केला आहे.

या प्रकरणातील सर्वात महत्त्वाची बाब म्हणजे पीडित महिलेने पोलिसांकडे ठोस पुरावे सादर केले आहेत. यामध्ये ऑडिओ क्लिप्स, पेन ड्राइव्ह तसेच काही संबंधित कागदपत्रांचा समावेश आहे. या पुराव्यांमुळे आरोपांची सत्यता तपासण्यास महत्त्वाची मदत होणार असल्याचे सूत्रांनी सांगितले. पुराव्यांच्या आधारे तपास अधिक गतीने पुढे जाण्याची शक्यता वर्तवली जात आहे.

दरम्यान, या तक्रारीनंतर विभागात मोठी खळबळ उडाली असून कर्मचाऱ्यांमध्येही चर्चा सुरू आहे. कार्यस्थळी महिलांच्या सुरक्षिततेचा मुद्दा पुन्हा एकदा ऐरणीवर आला आहे. वरिष्ठ अधिकाऱ्यांकडून होणाऱ्या अशा प्रकारच्या वर्तनाबाबत कठोर भूमिका घेण्याची मागणीही व्यक्त होत आहे.या प्रकरणाचा तपास राजापेठ पोलीस ठाण्याचे पोलिस निरीक्षक Punit Kulat यांच्या मार्गदर्शनाखाली सुरू आहे. पोलिसांकडून सर्व बाजूंची सखोल चौकशी करण्यात येत असून सादर केलेल्या पुराव्यांची पडताळणी केली जात आहे. संबंधित अधिकाऱ्याचेही बयान नोंदवले जाणार असल्याची माहिती मिळत आहे.

या प्रकरणात पुढे काय कारवाई होते, संबंधित अधिकाऱ्यावर कोणती शिस्तभंगात्मक किंवा कायदेशीर कारवाई होते, याकडे सर्वांचे लक्ष लागले आहे. प्रशासनाने निष्पक्ष तपास करून सत्य बाहेर आणावे, अशी अपेक्षा व्यक्त केली जात आहे.

---------------

हिंदुस्थान समाचार / अरुण जोशी