अमरावती, 18 एप्रिल (हिं.स.) : महानगरपालिका निवडणूक नियमांचे उल्लंघन केल्याच्या आरोपावरून एमआयएमच्या महिला नगरसेविका नुझात परवीन शाकिर हुसेन यांना महापालिका प्रशासनाने कारणे दाखवा नोटीस बजावली आहे. संबंधित नगरसेविकेला सात दिवसांच्या आत लेखी खुलासा सादर करण्याचे निर्देश देण्यात आले आहेत.

वॉर्ड क्रमांक 21-बी मधून निवडून आलेल्या या नगरसेविकेवर दोनपेक्षा अधिक अपत्ये असल्याचा आरोप करण्यात आला आहे. विद्यमान निवडणूक नियमांनुसार, दोनपेक्षा जास्त मुले असलेले उमेदवार निवडणूक लढवण्यास अपात्र ठरतात. या पार्श्वभूमीवर तक्रार दाखल झाल्यानंतर महानगरपालिकेच्या सचिव विभागाने ही कारवाई केली.

यापूर्वीही महानगरपालिकेत अशाच प्रकारचे प्रकरण समोर आले होते, ज्यामध्ये संबंधित नगरसेविकेला पदाचा राजीनामा द्यावा लागला होता. त्यामुळे या नव्या प्रकरणाकडे प्रशासनासह राजकीय वर्तुळाचे लक्ष लागले आहे.

नगरसेविकेकडून मिळणाऱ्या खुलाशाच्या आधारे पुढील कारवाई निश्चित केली जाईल, असे मनपा प्रशासनाने स्पष्ट केले आहे

----------------

हिंदुस्थान समाचार / अरुण जोशी