अमरावती, 18 एप्रिल (हिं.स.) विदर्भातील प्रसिद्ध पर्यटन नगरी चिखलदरा येथे यंदा उष्णतेने नवा विक्रम प्रस्थापित केला आहे. सामान्यतः थंड हवामानासाठी ओळखल्या जाणाऱ्या या हिल स्टेशनचे तापमान प्रथमच ४१ अंश सेल्सियसपर्यंत पोहोचले असून पर्यटक आणि स्थानिक नागरिकांमध्ये चिंतेचे वातावरण निर्माण झाले आहे. विशेष म्हणजे, चिखलदरा हे नेहमीच थंड आणि आल्हाददायक हवामानासाठी प्रसिद्ध राहिले आहे. मात्र यावेळी वाढत्या उष्णतेमुळे या ओळखीवरच प्रश्नचिन्ह निर्माण झाले आहे. तज्ज्ञांच्या मते, हा पर्यावरणीय असंतुलन आणि हवामान बदलाचा संकेत आहे. तापमानातील या अनपेक्षित वाढीचा परिणाम केवळ पर्यटकांच्या संख्येवरच नव्हे, तर स्थानिक जीवनशैली, जलस्रोत आणि वन्यजीवांवरही नकारात्मक स्वरूपात दिसून येऊ शकतो. स्थानिक नागरिकांचे म्हणणे आहे की, मागील काही वर्षांत वृक्षतोड, कमी होत चाललेले जलस्रोत आणि वाढते प्रदूषण, यामुळे हवामानात हा बदल दिसून येत आहे. योग्यवेळी ठोस उपाययोजना केल्या नाहीत, तर चिखलदऱ्याचे नैसर्गिक सौंदर्य आणि थंड हवामान धोक्यात येऊ शकते. प्रशासन आणि पर्यावरणप्रेमींनी अधिकाधिक वृक्षारोपण करणे, जलसंधारणावर भर देणे आणि पर्यावरण संवर्धनासाठी सामूहिक प्रयत्न करण्याचे आवाहन केले आहे, जेणेकरून चिखलदऱ्याची ओळख कायम राखता येईल.

---------------

हिंदुस्थान समाचार / अरुण जोशी