अमरावती, 06 एप्रिल (हिं.स.)

सलग आलेल्या सुट्ट्यांमुळे अमरावती कृषी उत्पन्न बाजार समितीत शेतमालाची आवक मोठ्या प्रमाणात वाढली असून, सध्या बाजार समिती परिसरात प्रचंड गर्दीचे चित्र पाहायला मिळत आहे. सुट्ट्यांच्या कालावधीत व्यवहार बंद राहिल्यानंतर शेतकऱ्यांनी एकाचवेळी आपला माल विक्रीसाठी आणल्याने आवकेत ही अचानक वाढ झाल्याचे दिसून येत आहे.दररोज जवळपास ८०० हून अधिक गाड्या शेतमाल घेऊन बाजार समितीत दाखल होत आहेत. त्यामुळे बाजार समितीच्या मुख्य प्रवेशद्वारावर वाहनांच्या लांबच लांब रांगा लागत असून, काही ठिकाणी वाहतूक कोंडीसारखी परिस्थिती निर्माण झाली आहे. शेतकऱ्यांना आपला माल उतरवण्यासाठी आणि नोंदणीसाठी बराच वेळ प्रतीक्षा करावी लागत आहे.सध्या तूर, हरभरा आणि गहू या प्रमुख पिकांची मोठ्या प्रमाणात आवक होत असून, दररोज अंदाजे ३० हजार क्विंटल शेतमाल बाजार समितीत येत आहे. या वाढलेल्या आवकेमुळे बाजार समिती प्रशासनावरही मोठा ताण पडत आहे. लिलाव प्रक्रिया सुरळीत पार पडावी यासाठी अतिरिक्त कर्मचारी नियुक्त करणे, नोंदणी प्रक्रिया वेगवान करणे यांसारख्या उपाययोजना प्रशासनाकडून केल्या जात आहेत.तथापि, वाढलेल्या आवकेमुळे शेतमालाच्या दरांवर दबाव येण्याची शक्यता व्यक्त केली जात आहे. विशेषतः तूर आणि हरभरा यांसारख्या पिकांच्या दरात चढ-उतार होऊ शकतात, अशी माहिती व्यापाऱ्यांकडून दिली जात आहे. यामुळे शेतकऱ्यांना अपेक्षित भाव मिळेल का, याबाबतही काहीशी चिंता व्यक्त होत आहे.दरम्यान, बाजार समितीत वाढती गर्दी आणि वाहनांच्या रांगा लक्षात घेता शेतकऱ्यांनी नियोजनपूर्वक माल आणावा, असे आवाहन प्रशासनाकडून करण्यात आले आहे. परिस्थिती नियंत्रणात ठेवण्यासाठी आवश्यक त्या उपाययोजना सुरू असून, लवकरच परिस्थिती सुरळीत होईल, असा विश्वासही व्यक्त करण्यात येत आहे.

---------------

हिंदुस्थान समाचार / अरुण जोशी