कोलकाता, १७ मे (हिं.स.) भारताचा माजी क्रिकेटपटू अंबाती रायडूच्या मते, सुनील नरेन इंडियन प्रीमियर लीगमधील सर्वोत्तम क्रिकेटपटू आहे. तो कोणत्याही फलंदाजासाठी एक कडवा प्रतिस्पर्धी आहे.शनिवारी कोलकाता येथील ईडन गार्डन्स स्टेडियमवर गुजरात टायटन्सविरुद्ध कोलकाता नाइट रायडर्सच्या २९ धावांच्या विजयात सुनील नरेनने महत्त्वाची भूमिका बजावली. त्याने आपल्या चार षटकांच्या स्पेलमध्ये २९ धावांत २ बळी घेतले होते. त्याला सामनावीर पुरस्कारही मिळाला. हा नरेनचा २०० वा आयपीएल सामनाही होता.

रायडू म्हणाला की, नरेन फलंदाजी आणि गोलंदाजी या दोन्हीमध्ये एक जबरदस्त सामना-विजेता आहे. आयपीएलमध्ये अनेक महान क्रिकेटपटू होऊन गेले आहेत, पण हा क्रिकेटपटू नेहमीच वेगळा ठरतो. माझ्या मते, तो या यादीत अग्रस्थानी आहे. रायडू म्हणाला, मला वाटते की फलंदाज म्हणून सुनील नरेनसारख्या गोलंदाजाचा सामना करणे नेहमीच कठीण असते, कारण चेंडू खेळपट्टीवर स्थिरावतो. यामुळे अनेकदा तुमचा तोल जातो.

आयपीएलच्या इतिहासातील सर्वाधिक बळी घेणाऱ्या गोलंदाजांच्या यादीत नरेन तिसऱ्या क्रमांकावर आहे, त्याच्या पुढे युझवेंद्र चहल (२३० बळी) आणि भुवनेश्वर कुमार (२२० बळी) आहेत. त्याच्या नावावर २०५ बळी आहेत. तो आयपीएलमधील सर्वाधिक सामने खेळलेला परदेशी क्रिकेटपटू देखील आहे. नरेन २०१२ पासून केकेआर संघासोबत आहे. सामन्याबद्दल बोलायचे झाल्यास, प्रथम फलंदाजी करताना कोलकाता नाईट रायडर्सने २० षटकांत दोन गडी गमावून २४७ धावांचा डोंगर उभा केला. प्रत्युत्तरात, गुजरातला चार गडी गमावून केवळ २१८ धावाच करता आल्या. शुभमन गिल, जोस बटलर आणि साई सुदर्शन यांनी संघासाठी अर्धशतके झळकावली.

---------------

हिंदुस्थान समाचार / वृषाली देशपांडे