रायगड, 18 मे (हिं.स.)। सामाजिक न्याय विभागांतर्गत सहाय्यक आयुक्त समाज कल्याण, रायगड यांच्या अधिपत्याखाली जावळी, ता. माणगाव येथे अनुसूचित जाती व नवबौद्ध मुलांसाठी कार्यरत असलेल्या शासकीय निवासी शाळेत सन २०२६-२७ या शैक्षणिक वर्षासाठी मोफत प्रवेश प्रक्रिया सुरू करण्यात आली आहे. इयत्ता सहावी ते दहावीपर्यंतच्या गरीब, हुशार, होतकरू तसेच मागासवर्गीय विद्यार्थ्यांना गुणवत्तेनुसार प्रवेश दिला जाणार आहे.

शासन निर्णयानुसार प्रवेशासाठी विविध प्रवर्गांसाठी आरक्षण निश्चित करण्यात आले असून अनुसूचित जातींसाठी ८० टक्के, अनुसूचित जमातींसाठी १० टक्के, विमुक्त जाती व भटक्या जमातींसाठी ५ टक्के, विशेष मागास प्रवर्गासाठी २ टक्के तर अपंग विद्यार्थ्यांसाठी ३ टक्के आरक्षण राखीव ठेवण्यात आले आहे.

या निवासी शाळेत विद्यार्थ्यांना प्रशस्त इमारत, निसर्गरम्य वातावरण, मोफत निवास व भोजन सुविधा उपलब्ध करून देण्यात येणार आहेत. तसेच शैक्षणिक साहित्य, मोफत गणवेश, भव्य क्रीडांगण, क्रीडा साहित्य, स्पर्धा परीक्षांची तयारी, सुसज्ज ग्रंथालय, प्रयोगशाळा आणि डिजिटल क्लासरूमसारख्या आधुनिक सुविधा विद्यार्थ्यांना मिळणार आहेत.

प्रवेश प्रक्रिया दि. १ एप्रिल २०२६ पासून सुरू झाली असून इच्छुक विद्यार्थ्यांनी सहाय्यक आयुक्त समाज कल्याण कार्यालय, रायगड-अलिबाग येथे संपर्क साधण्याचे आवाहन करण्यात आले आहे. प्रवेशासाठी जातीचा दाखला, उत्पन्न प्रमाणपत्र, रहिवासी दाखला, गुणपत्रक, आधार कार्ड, बँक पासबुक व इतर आवश्यक कागदपत्रे सादर करणे बंधनकारक आहे.

अनुसूचित जाती व जमाती विद्यार्थ्यांसाठी पालकांचे वार्षिक उत्पन्न २ लाख ५० हजार रुपयांच्या आत, तर इतर मागास घटकांसाठी १ लाख ५० हजार रुपयांच्या आत असणे आवश्यक असल्याचे प्रशासनाने स्पष्ट केले आहे.

---------------

हिंदुस्थान समाचार / संदेश साळुंके (रायगड)