जळगाव, 18 मे (हिं.स.) : उत्तर महाराष्ट्रातील शेतकऱ्यांसाठी अत्यंत महत्त्वाची मानली जाणारी नारपार–गिरणा नदीजोड योजना आता प्रत्यक्ष अंमलबजावणीच्या टप्प्याकडे वेगाने पुढे जात असून, या प्रकल्पामुळे जळगाव, नाशिक आणि धुळे जिल्ह्यांना मोठा लाभ होणार असल्याचे प्रतिपादन पालकमंत्री गुलाबराव पाटील यांनी केले आहे.

ही योजना 27 जून 2023 रोजी जळगाव येथे झालेल्या “शासन आपल्या दारी” कार्यक्रमात तत्कालीन मुख्यमंत्री तथा विद्यमान उपमुख्यमंत्री Eknath Shinde यांनी जाहीर केली होती. त्यानंतर महायुती सरकारने सातत्याने पाठपुरावा करत या प्रकल्पाला प्रशासकीय मान्यता, आर्थिक मंजुरी आणि आता कार्यारंभ आदेशापर्यंत आणले आहे.

प्रकल्पाच्या पहिल्या टप्प्यासाठी सुमारे ₹4,116 कोटींच्या कामाचा कार्यारंभ आदेश जारी करण्यात आला असून, त्यामुळे उत्तर महाराष्ट्रातील दुष्काळी भागांना मोठा दिलासा मिळण्याची अपेक्षा आहे. विशेषतः जळगाव जिल्ह्यातील चाळीसगाव, पाचोरा, भडगाव, जामनेर, धरणगाव तसेच नाशिक जिल्ह्यातील मालेगाव, देवळा, सटाणा, कळवण आणि धुळे जिल्ह्यातील विविध भागांना या योजनेचा थेट फायदा होणार आहे.

या प्रकल्पामुळे शेतीसाठी सिंचनाचे पाणी उपलब्ध होऊन केळी, कांदा, द्राक्ष, मका आणि कापूस यांसारख्या प्रमुख पिकांना स्थैर्य मिळणार आहे. तसेच भूजल पातळी वाढणे, पिण्याच्या पाण्याचा प्रश्न कमी होणे, ग्रामीण अर्थव्यवस्थेला चालना मिळणे आणि स्थलांतर कमी होणे असे सकारात्मक परिणाम अपेक्षित आहेत.

पालकमंत्री गुलाबराव पाटील यांनी सांगितले की, “ही योजना महायुती सरकारच्या सामूहिक प्रयत्नांचे फलित आहे.” या प्रक्रियेत मुख्यमंत्री देवेंद्र फडणवीस उपमुख्यमंत्री एकनाथ शिंदे , दिवंगत उपमुख्यमंत्री अजित पवार आणि जलसंपदामंत्री गिरीश महाजन यांनी महत्त्वाची भूमिका बजावल्याचे त्यांनी नमूद केले.

या योजनेमुळे उत्तर महाराष्ट्रातील दीर्घकाळ प्रलंबित पाणीप्रश्न मार्गी लागेल आणि भविष्यातील पिढ्यांसाठी हा प्रकल्प “जलसंजीवनी” ठरेल, अशी भावना शेतकरी व स्थानिक नागरिकांकडून व्यक्त केली जात आहे.----------------

हिंदुस्थान समाचार / मनोहर कांडेकर