लातूर, 18 मे (हिं.स.)। देशभर गाजत असलेल्या नीट पेपरफुटी प्रकरणाने आता आणखी गंभीर वळण घेतल्याची माहिती समोर येत आहे. लातूरमधील प्रा. मोटेगावकर यांच्याभोवती संशयाचे वर्तुळ अधिक गडद होत असून त्यांना पुण्याच्या सीबीआय कार्यालयात नेण्यात आल्याची धक्कादायक चर्चा सध्या जोर धरत आहे. या घडामोडींमुळे संपूर्ण लातूर शहरात प्रचंड खळबळ उडाली असून शैक्षणिक वर्तुळात भीती आणि संभ्रमाचे वातावरण निर्माण झाले आहे.

मिळालेल्या माहितीनुसार, काही दिवसांपूर्वी केंद्रीय अन्वेषण विभागाच्या (सीबीआय) अधिकाऱ्यांनी लातूरमध्ये प्रा. मोटेगावकर यांच्या निवासस्थानी अचानक धाड टाकली होती. तब्बल दहा तास चाललेल्या या चौकशीत अनेक महत्त्वाची कागदपत्रे, डिजिटल पुरावे आणि आर्थिक व्यवहारांची माहिती तपासण्यात आल्याचे सांगितले जात आहे. चौकशीदरम्यान अधिकाऱ्यांनी त्यांच्या कुटुंबीयांचीही विचारपूस केल्याची माहिती सूत्रांकडून समोर येत आहे. या प्राथमिक चौकशीनंतर सीबीआयकडून प्रा. मोटेगावकर यांना अधिकृत नोटीस बजावण्यात आली होती. त्यांना पुढील तपासासाठी सहकार्य करण्याचे निर्देश देण्यात आले होते. मात्र त्यानंतर माध्यमांमध्ये वेगवेगळ्या प्रकारच्या बातम्या झळकू लागल्या. काही वृत्तांमध्ये त्यांना क्लीनचिट मिळाल्याचा दावा करण्यात आला, तर काही ठिकाणी तपास अधिक तीव्र झाल्याचे सांगण्यात आले. या सर्व चर्चांदरम्यान अचानक घडलेल्या नव्या कारवाईमुळे प्रकरण आणखी गाजू लागले आहे.

सूत्रांच्या माहितीनुसार, सीबीआयचे पथक पुन्हा एकदा रात्री उशिरा लातूरमध्ये दाखल झाले. यावेळी त्यांनी थेट प्रा. मोटेगावकर यांच्या कार्यालयात जाऊन रात्रभर चौकशी केली. या कारवाईदरम्यान काही महत्त्वाचे दस्तऐवज आणि संगणकीय माहिती जप्त केल्याची चर्चा आहे. चौकशी इतकी गुप्तपणे पार पडली की स्थानिक प्रशासनालाही याची फारशी कल्पना नव्हती, असे बोलले जात आहे. सर्वात मोठी खळबळ तेव्हा उडाली जेव्हा चौकशी संपताच प्रा. मोटेगावकर यांना तातडीने पुण्यातील सीबीआय कार्यालयात नेण्यात आल्याची माहिती समोर आली. अधिकृत पातळीवर कोणतीही पुष्टी करण्यात आलेली नसली तरी लातूरमध्ये या चर्चेने अक्षरशः वादळ निर्माण केले आहे. अनेक राजकीय, सामाजिक आणि शैक्षणिक वर्तुळातील व्यक्ती या घडामोडींवर बारकाईने लक्ष ठेवून आहेत.

नीट पेपरफुटी प्रकरण हे सुरुवातीपासूनच देशभर चर्चेत राहिले आहे. लाखो विद्यार्थ्यांच्या भवितव्याशी संबंधित असलेल्या या परीक्षेत गैरप्रकार झाल्याचा आरोप झाल्यानंतर देशभर संतापाची लाट उसळली होती. अनेक विद्यार्थ्यांनी आणि पालकांनी रस्त्यावर उतरून निषेध नोंदवला होता. त्यानंतर या प्रकरणाचा तपास विविध यंत्रणांकडून सुरू झाला आणि अखेर प्रकरण सीबीआयकडे सोपवण्यात आले.तपासादरम्यान अनेक राज्यांमध्ये धाडी टाकण्यात आल्या. विविध एजंट, मध्यस्थ, कोचिंग सेंटर आणि शैक्षणिक संस्थांशी संबंधित व्यक्तींची चौकशी करण्यात आली. या साखळीत लातूरचे नाव पुढे आल्यानंतर राज्याच्या शैक्षणिक प्रतिमेलाही मोठा धक्का बसला होता. लातूर पॅटर्न म्हणून देशभर ओळखल्या जाणाऱ्या शिक्षण व्यवस्थेवर आता प्रश्नचिन्ह निर्माण होऊ लागले आहे.

प्रा. मोटेगावकर हे शैक्षणिक क्षेत्रातील परिचित नाव मानले जाते. त्यामुळे त्यांच्या नावाभोवती निर्माण झालेल्या संशयामुळे अनेकांना धक्का बसला आहे. त्यांच्या समर्थकांकडून हे सर्व राजकीय आणि प्रतिमेला धक्का देण्याचा प्रयत्न असल्याचे सांगितले जात आहे. तर दुसरीकडे काही जण “सीबीआय विनाकारण एवढी मोठी कारवाई करत नाही” असे म्हणत तपासात मोठे धागेदोरे मिळाल्याचा अंदाज व्यक्त करत आहेत.दरम्यान, सीबीआयकडून या प्रकरणाबाबत कोणतीही अधिकृत माहिती जाहीर करण्यात आलेली नाही. त्यामुळे अफवा आणि चर्चांना अधिक उधाण आले आहे. सोशल मीडियावरही विविध प्रकारचे दावे केले जात असून काहींनी तर या प्रकरणात आणखी मोठ्या नावांचा समावेश असू शकतो, असा अंदाज व्यक्त केला आहे.लातूरमध्ये मात्र वातावरण पूर्णपणे तापलेले दिसत आहे. शैक्षणिक संस्थांमध्ये या प्रकरणाचीच चर्चा असून विद्यार्थी आणि पालकांमध्ये चिंतेचे वातावरण आहे. “जर शिक्षण क्षेत्रातील मोठी नावेच संशयाच्या भोवऱ्यात अडकत असतील तर विद्यार्थ्यांनी कोणावर विश्वास ठेवायचा?” असा सवाल अनेक पालक उपस्थित करत आहेत.

राजकीय पातळीवरही या प्रकरणाचे पडसाद उमटू लागले आहेत. विरोधकांनी सरकारवर जोरदार हल्लाबोल सुरू केला असून “पेपरफुटी माफियांना राजकीय संरक्षण मिळत आहे का?” असा सवाल उपस्थित केला जात आहे. दुसरीकडे सत्ताधारी गटाकडून तपास सुरू असून दोषींवर कठोर कारवाई होईल, असे सांगितले जात आहे. आता सर्वांचे लक्ष पुण्यातील सीबीआय कार्यालयाकडे लागले आहे. प्रा. मोटेगावकर यांची पुढील चौकशी काय वळण घेणार, आणखी कोणती नावे समोर येणार आणि नीट पेपरफुटी प्रकरणातील पुढचा मोठा स्फोट काय असणार याबाबत उत्सुकता वाढली आहे.

---------------------

हिंदुस्थान समाचार / Mahesh Madanrao Chitnis