चेन्नई, 18 मे (हिं.स.)आयपीएल २०२६ दरम्यान महेंद्रसिंग धोनीने चेन्नईमधील राष्ट्रीय सुरक्षा दलाच्या (एनएसजी) प्रादेशिक केंद्राला भेट दिली. त्याने एनएसजी कमांडोंसोबत वेळ घालवला आणि ते वापरत असलेल्या बंदुका व रायफल्सची चाचणी घेतली. एमएस धोनीने कमांडो आणि त्यांच्या कुटुंबीयांशी बराच वेळ संवाद साधला आणि छायाचित्रांसाठी पोझही दिली. चेन्नई सुपर किंग्स संघाचा भाग असलेला हा क्रिकेटपटू या हंगामात एकही सामना खेळलेला नाही. तो पोटरीच्या दुखापतीने त्रस्त असून, तो तंदुरुस्त आहे की नाही हे अद्याप स्पष्ट झालेले नाही.

धोनीने एनएसजीच्या प्रादेशिक केंद्रात कमांडोंसोबत बराच वेळ घालवला, ज्यात त्यांच्यासोबत जेवणाचाही समावेश होता. धोनीच्या गोळीबाराचे फुटेज सर्वप्रथम सोशल मीडियावर समोर आले, ज्यात तो फायरिंग रेंजवर काही मीटर अंतरावरून लक्ष्य साधताना दिसत आहे. त्यानंतर त्याने मशीनगन चालवण्याचा प्रयत्न केला. त्याने एनएसजी कमांडोची हेकलर अँड कोच एमपी५ सबमशीनगन चालवली. त्याने प्रथम उभे राहून प्रयत्न केला, त्यानंतर बसून लक्ष्य साधले.

धोनी एनएसजी कमांडोंसोबत त्याच्या फिटनेसवर चर्चा करतानाही दिसला. तो विचारतो, मला फिट वाटतंय, बरोबर ना? सैनिक होकार देतात. एक जण उत्तर देतो की, तो मागच्या वेळेपेक्षाही जास्त फिट होता. त्यावर धोनी म्हणतो, जसा काळ पुढे जातो, तशी जास्त मेहनत करावी लागते. त्यानंतर दुसरा एक सैनिक २०२३ मध्ये धोनीच्या एनएसजी कॅम्पमधील आगमनाचा उल्लेख करतो.

धोनीला २०११ मध्ये टेरिटोरियल आर्मीमध्ये दाखल करण्यात आले आणि त्याला पॅराशूट रेजिमेंटमध्ये लेफ्टनंट कर्नलचा मानद दर्जा देण्यात आला. २०१५ मध्ये, धोनीने आग्रा येथे विमानातून पाच अनिवार्य उड्या पूर्ण केल्या. २०१९ मध्ये आंतरराष्ट्रीय क्रिकेटपासून दूर असताना, त्याने जम्मू आणि काश्मीरमधील १०६ व्या पायदळ बटालियनमध्ये सेवा बजावली. दोन आठवडे तो सैनिकांसोबत राहिला, रात्रीचा पहारा दिला आणि गस्त घातली. २०१८ मध्ये जेव्हा धोनीला पद्मभूषण पुरस्काराने सन्मानित करण्यात आले, तेव्हा तो लष्करी गणवेशातच तो स्वीकारायला गेला होता.

---------------

हिंदुस्थान समाचार / वृषाली देशपांडे