नवी दिल्ली, 18 मे (हिं.स.)भारताची स्टार पुरुष दुहेरी बॅडमिंटन जोडी, सात्विकसाईराज रंकीरेड्डी आणि चिराग शेट्टी, यांनी आगामी मलेशिया मास्टर्समधून माघार घेण्याचा निर्णय घेतला आहे. थायलंड ओपनमधील त्यांच्या प्रभावी कामगिरीनंतर, दोन्ही बॅडमिंटनपटूंना आता त्यांचे व्यस्त वेळापत्रक संतुलित पद्धतीने सांभाळायचे आहे. थायलंड ओपनच्या अंतिम सामन्यात उपविजेतेपद पटकावल्यानंतर, या भारतीय जोडीने आता सिंगापूर, इंडोनेशिया आणि ऑस्ट्रेलिया येथील स्पर्धांमध्ये थेट सहभागी होणार असल्याचे निश्चित केले होते. सामन्यानंतर सात्विक म्हणाला, नाही, आम्ही मलेशियामध्ये खेळणार नाही. आता आम्ही सिंगापूर, इंडोनेशिया आणि ऑस्ट्रेलियामध्ये खेळू.

थायलंड ओपनच्या अंतिम सामन्यात, या भारतीय जोडीला इंडोनेशियाच्या लिओ रॉली कार्नांडो आणि डॅनियल मार्थिन यांच्याकडून २१-१२, २५-२३ असा पराभव पत्करावा लागला. निंबुत्र स्टेडियमवर खेळल्या गेलेल्या या सामन्यात, भारतीय जोडी पहिल्या गेममध्ये पूर्णपणे दबावाखाली दिसली होती. पण दुसऱ्या गेममध्ये चार चॅम्पियनशिप पॉईंट्स वाचवून त्यांनी जोरदार पुनरागमन केले. पण त्यांना सामना निर्णायक गेमपर्यंत नेता आला नाही.

सामन्यानंतर चिराग शेट्टी म्हणाला, आमची सुरुवात चांगली झाली नाही. शटल खूप वेगवान होते आणि आम्ही ते खाली ठेवण्याचा प्रयत्न केला, पण आम्ही सतत बचावात्मक पवित्र्यात होतो. दुसऱ्या गेममध्ये, आम्ही शटल उंच खेळायला सुरुवात केली आणि काही फ्लिक्सचा वापर केला, ज्यामुळे सामन्यात सुधारणा झाली, पण शेवटी ते पुरेसे ठरले नाही.

थायलंड ओपनमध्ये उपविजेतेपद मिळवूनही, भारतीय जोडीच्या कामगिरीने सकारात्मक संकेत दिले आहेत. सात्विक आणि चिराग आता सिंगापूर, इंडोनेशिया आणि ऑस्ट्रेलिया येथे होणाऱ्या आगामी स्पर्धांमध्ये जोरदार पुनरागमन करण्याच्या प्रयत्नात असणार आहेत.

---------------

हिंदुस्थान समाचार / वृषाली देशपांडे