-करिअर गोल्डन मास्टर्स पूर्ण करणारा जगातील दुसरा टेनिसपटू-नोव्हाक जोकोविचच्या विक्रमाशी बरोबरी

रोम, 18 मे (हिं.स.)यानिक सिनरने इटालियन ओपन २०२६ चे विजेतेपद पटकावून इतिहास रचला. रोमच्या प्रतिष्ठित फोरो इटालिको येथे झालेल्या अंतिम सामन्यात, जागतिक क्रमवारीत अव्वल असलेल्या सिनरने नॉर्वेच्या कॅस्पर रुडला ६-४, ६-४ अशा सरळ सेट्समध्ये पराभूत केले. या विजयासह, सिनर ५० वर्षांत इटालियन ओपन जिंकणारा पहिला इटालियन पुरुष टेनसपटू ठरला. यापूर्वीचे विजेतेपद १९७६ मध्ये एड्रियानो पानाटा यांच्या नावावर होते.

सिनरचा विजय केवळ देशांतर्गत विजेतेपदापुरता मर्यादित नव्हता. त्याने टेनिसच्या इतिहासात आणखी एक मोठा टप्पा गाठला आहे. तो आता नोव्हाक जोकोविचनंतर, सर्व नऊ एटीपी मास्टर्स १००० स्पर्धा जिंकणारा दुसरा टेनिसपटू ठरला आहे. जोकोविचने २०१८ मध्ये हा पराक्रम केला होता, तर २४ वर्षीय सिनरने तरुण वयातच या विक्रमाची बरोबरी केली आहे.

सिनर उत्कृष्ट फॉर्ममध्ये आहे. त्याने आपला सलग २९ वा सामना जिंकून, यावर्षी क्ले-कोर्टवरील आपला विक्रम १७-० असा केला आहे. त्याचा शेवटचा पराभव फेब्रुवारीमध्ये कतार ओपनमध्ये झाला होता. आता सर्वांचे लक्ष पुढच्या आठवड्यात सुरू होणाऱ्या फ्रेंच ओपनवर आहे, जिथे सिनरला विजेतेपदाचा प्रमुख दावेदार मानले जात आहे. रोलँड गॅरोस हे एकमेव ग्रँडस्लॅम आहे जे त्याला अजून जिंकायचे आहे.

अंतिम सामन्यादरम्यान, रोमचे सेंट्रल कोर्ट पूर्णपणे सिनरच्या उत्साहाने भारले होते. सिनरचा सिग्नेचर रंग असलेल्या केशरी रंगाचे कपडे घालून मोठ्या संख्येने चाहते आले होते. संपूर्ण सामन्यादरम्यान स्टेडियममध्ये सिनर, सिनर च्या घोषणा घुमत होत्या. इटलीचे राष्ट्राध्यक्ष सर्जिओ मॅटारेला हे देखील सामना पाहण्यासाठी उपस्थित होते. विजेतेपद जिंकल्यानंतर सिनर म्हणाला, ५० वर्षांनंतर ही ट्रॉफी इटलीमध्ये परत आली आहे. हा माझ्यासाठी आणि संपूर्ण देशासाठी एक खूप खास क्षण आहे.

दोन वेळा फ्रेंच ओपनचा अंतिम सामना खेळलेल्या रुडने सामन्याची चांगली सुरुवात केली आणि सुरुवातीलाच आघाडी घेतली होतीय पण सिनरने शानदार पुनरागमन करत सामन्यावर पूर्ण नियंत्रण मिळवले. सिनरने दुसऱ्या सेटमध्ये एका जोरदार बॅकहँड विनरने निर्णायक आघाडी घेतली. रुडविरुद्धचा त्याचा कारकिर्दीतील विक्रम आता ५-० असा आहे. सामन्यानंतर रुड म्हणाला, या वर्षी तू जे काही करत आहेस त्याचे वर्णन करणे कठीण आहे. इतिहास घडवल्याबद्दल अभिनंदन.

---------------

हिंदुस्थान समाचार / वृषाली देशपांडे