नांदेड, 20 मे (हिं.स.)।

नांदेड परिक्षेत्रात अवैध व्यवसाय विरोधी मोहीम राबविण्यात येत आहे. पोलीस उप महानिरीक्षक यांच्या अधिपत्याखालील पथकाने जिल्ह्यातील लिंबगाव पोलीस ठाणे हद्दीत मौजे बोरगाव येथील गोदावरी नदीचे घाटावर अवैधरीत्या वाळू उपसा करणाऱ्या 9 जणांविरुद्ध कार्यवाही करून त्यांच्याकडून दोन हायवा. एक टिप्पर, जेसीबी मशीन, इंजिन बोट, फायबर बोट, दहा तराफे व 50 ब्रास वाळू असा 1 कोटी 36 लाख 10 हजार रुपये किंमतीचा मुद्देमाल जप्त केला आहे.

अवैध गुटखा विक्री करणाऱ्या 2 इसमविरुद्ध कारवाई करून त्यांच्याकडून 30 लाख 69 हजार 748 रुपयांचा मुद्देमाल जप्त करण्यात आला आहे. मटका जुगार खेळणाऱ्या व खेळविणाऱ्या एकूण 11 इसमांविरुद्ध महाराष्ट्र जुगार कायद्याअंतर्गत 3 गुन्हे दाखल करण्यात आले असून, त्यांच्याकडून 91 हजार 90 रुपयांचा मुद्देमाल जप्त करण्यात आला आहे. यासोबतच, अवैध दारू विक्री करणाऱ्या 34 इसमांविरुद्ध 29 गुन्हे दाखल करून, त्यांच्याकडून 1 लाख 88 हजार 200 रुपयांचा मुद्देमाल जप्त करण्यात आला आहे.

अवैध वाळू उपसा करणाऱ्यां विरुद्धही (2) गुन्हे दाखल करून त्यांच्याकडून 1 कोटी 16 लाख 55 हजार 500 रुपयांचा मुद्देमाल जप्त करण्यात आला आहे. उपरोक्त कारवाई सोबतच, शस्त्र अधिनियमान्वये 2, कोटपा अन्वये 5 तर इतर अधिनियमाखाली मिळून, एकूण 45 कारवाया करण्यात आल्या असून, यात निष्पन्न झालेल्या आरोपीकडून एकूण 2 कोटी 86 लाख 19 हजार 883 रुपयांचा मुद्देमाल जप्त करण्यात आला आहे.

---------------

हिंदुस्थान समाचार / Sangita Hanumant Rao Chitanis