-'झीएंटरटेनमेंट'ला फिफा विश्वचषकाचे प्रक्षेपण हक्क

नवी दिल्ली, 01 जून (हिं.स.)झी एंटरटेनमेंटने सोमवारी जाहीर केले की, त्यांनी फिफा विश्वचषक २०२६, फिफा महिला विश्वचषक २०२७ आणि फिफा विश्वचषक २०३० यासह ३९ फिफा स्पर्धांचे मीडिया हक्क मिळवले आहेत. या करारानुसार, झी २०२६ ते २०३४ पर्यंत भारतात फिफा स्पर्धांचे प्रसारण करेल. फिफा विश्वचषक ११ जून ते १९ जुलै दरम्यान होणार असून, त्याचे संयुक्त यजमानपद अमेरिका, कॅनडा आणि मेक्सिको यांच्याकडे आहे. पण, जास्त खर्चामुळे फिफाला भारतात प्रसारक (ब्रॉडकास्टर) मिळू शकला नाही. टाइम झोनमुळे, भारतातील विश्वचषक सामन्यांचे थेट प्रक्षेपण रात्री सुरू होणार होते, त्यामुळे भारतीय प्रसारकांना यात रस नव्हता. फिफा २०२६ ते २०३० च्या विश्वचषक सामन्यांच्या प्रसारण हक्कांसाठी १०० दशलक्ष अमेरिकन डॉलर्सची मागणी करत होती.

भारतातील फिफा विश्वचषक झी ग्रुपच्या नवीन चॅनल, युनाईट८ स्पोर्ट्सवर दाखवला जाईल. झी५ वर सामन्यांचे थेट प्रक्षेपण होणार असले तरी, प्रेक्षकांना संपूर्ण स्पर्धेदरम्यान हायलाइट्स, विश्लेषण कार्यक्रम, विशेष कार्यक्रम आणि फिफा डॉक्युमेंटरी कंटेंट देखील पाहता येईल.

झी आपल्या युनाईट८ स्पोर्ट्स नेटवर्कच्या माध्यमातून क्रीडा प्रसारण क्षेत्रात आपला विस्तार करत असतानाच हा फिफा हक्कांचा करार झाला आहे. जगातील सर्वात मोठ्या क्रीडा स्पर्धांपैकी एक भारतीय प्रेक्षकांपर्यंत पोहोचवण्यासाठी आम्ही उत्सुक आहोत, असे झीईएलचे सीईओ पुनीत गोएंका म्हणाले. फुटबॉल सर्व प्रदेश आणि वर्गांना जोडतो, आणि मीडिया हक्क मिळवण्यासाठी व समर्पित क्रीडा चॅनल सुरू करण्यासाठी केलेली आमची गुंतवणूक, त्याच्या दीर्घकालीन क्षमतेवरील आमचा विश्वास दर्शवते. सध्याची प्रासंगिकता आणि भविष्यातील वाढीची क्षमता आम्हाला जिथे दिसते, अशा मालमत्तांमध्ये गुंतवणूक करण्यावर आमचे लक्ष आहे. जागतिक स्पर्धा, युरोपियन क्लब स्पर्धा आणि वाढत्या डिजिटल प्रेक्षकांमुळे गेल्या दशकात भारतातील फुटबॉल प्रेक्षकसंख्येत सातत्याने वाढ झाली आहे.

---------------

हिंदुस्थान समाचार / वृषाली देशपांडे