नवी दिल्ली, 01 जून (हिं.स.)रॉयल चॅलेंजर्स बंगळूरुने शानदार कामगिरी करत आयपीएल २०२६ चे विजेतेपद पटकावले. रजत पाटीदारच्या नेतृत्वाखाली, आरसीबीने अंतिम सामन्यात गुजरात टायटन्सला ५ गडी राखून पराभूत केले. विजेतेपदाच्या सामन्यात आरसीबीच्या विजयाचा शिल्पकार विराट कोहली होता. आरसीबीने विजेतेपद यशस्वीपणे राखल्यानंतर, कोहलीने आपल्या सोशल मीडियावर एक पोस्ट केली, जी त्वरित व्हायरल झाली.

विराट कोहलीने 'एक्स' या सोशल मीडिया प्लॅटफॉर्मवर लिहिले, गेल्या वर्षी आम्ही स्वतःला एक प्रश्न विचारला होता: आपण सलग दोनदा विजेतेपद जिंकू शकतो का? आणि आम्ही ते पुन्हा करून दाखवले.

यपीएलच्या अंतिम सामन्यात कोहलीने शानदार फलंदाजी केली. विराटने व्यंकटेश अय्यरसोबत मिळून गुजरात टायटन्सविरुद्ध आरसीबीला एक चांगली सुरुवात करून दिली. या दोघांनी अवघ्या २७ चेंडूंमध्ये पहिल्या विकेटसाठी ६२ धावांची भागीदारी केली. कोहली उत्कृष्ट फॉर्ममध्ये दिसला आणि त्याने आपल्या आयपीएल कारकिर्दीतील सर्वात जलद अर्धशतक झळकावले. विराटने अवघ्या २५ चेंडूंमध्ये आपले अर्धशतक पूर्ण केले.

कोहलीने ४२ चेंडूंमध्ये १७८ च्या स्ट्राईक रेटने नाबाद ७५ धावा केल्या. त्याने आपल्या खेळीत नऊ चौकार आणि तीन षटकार मारले. टीम डेव्हिडने १७ चेंडूंमध्ये २४ धावांचे योगदान दिले. तत्पूर्वी, आरसीबीच्या गोलंदाजांनी उत्कृष्ट कामगिरी करत गुजरात टायटन्सला १५५ धावांवर रोखले. गुजरातकडून केवळ वॉशिंग्टन सुंदरने ३७ चेंडूंमध्ये शानदार ५० धावा करून आपला फॉर्म दाखवला. आरसीबीकडून, रसिक सलामने आपल्या चार षटकांध्ये केवळ २७ धावा देऊन तीन बळी घेतले, तर भुवनेश्वर कुमारने २९ धावा देऊन दोन बळी घेतले. जोश हेझलवूडनेही दोन बळी घेतले.

आरसीबी आयपीएलच्या इतिहासात विजेतेपद राखणारा केवळ तिसरा संघ ठरला आहे. आरसीबीपूर्वी, चेन्नई सुपर किंग्स आणि मुंबई इंडियन्सने ही कामगिरी केली होती. आयपीएल २०२६ मध्ये कोहली आरसीबीचा सर्वाधिक धावा करणारा फलंदाज होता. त्याने १६५ च्या स्ट्राईक रेटने १६७५ धावा केल्या.

---------------

हिंदुस्थान समाचार / वृषाली देशपांडे