-प्रशिक्षक ड्रिंक्स ब्रेक दरम्यान संघाशी बोलू शकणार- टी२० आंतरराष्ट्रीय सामन्यांमध्ये १५ मिनिटांचा ब्रेक अनिवार्य-कसोटी क्रिकेटमध्ये गुलाबी चेंडूच्या वापराबाबत चाचण्या घेण्यात येणार

अहमदाबाद, 01 जून (हिं.स.) : आंतरराष्ट्रीय क्रिकेट परिषदेने (आयसीसी) सोमवारी अहमदाबाद येथे झालेल्या आपल्या बोर्ड बैठकीत क्रिकेटच्या विविध प्रकारांशी संबंधित अनेक महत्त्वाच्या निर्णयांना मंजुरी दिली. या बैठकीत क्रिकेटपटू, प्रशिक्षक आणि सामना अधिकाऱ्यांशी संबंधित नियमांमधील बदलांना, तसेच कसोटी क्रिकेटमध्ये गुलाबी चेंडूच्या नवीन चाचणीलाही मंजुरी देण्यात आली.

आयसीसी बोर्डाने खेळण्याच्या नियमांमध्ये सुधारणा करण्यास मंजुरी दिली, ज्यामुळे मुख्य प्रशिक्षक किंवा त्यांचे नियुक्त प्रतिनिधी यांना निर्धारित ड्रिंक्स इंटरव्हल दरम्यान क्रिकेटपटूंशी सल्लामसलत करण्याची परवानगी मिळेल. यापूर्वी, सामन्यांदरम्यान प्रशिक्षणाच्या संवादावर कडक निर्बंध होते. पण नवीन नियमानुसार निर्धारित विश्रांतीच्या वेळी धोरणात्मक चर्चा करण्याची परवानगी मिळेल. यामुळे संघांना सामन्याच्या परिस्थितीनुसार चांगले निर्णय घेण्यास मदत होईल, असा विश्वास आहे.

आयसीसी बोर्डाने टी-२० आंतरराष्ट्रीय सामन्यांमध्ये डावांच्या दरम्यान १५ मिनिटांच्या अनिवार्य विश्रांतीच्या अंमलबजावणीलाही मंजुरी दिली. सामन्याचे कामकाज सुव्यवस्थित करणे, क्रिकेटपटूंना तयारीसाठी पुरेसा वेळ देणे आणि प्रसारणाच्या गरजा अधिक चांगल्या प्रकारे पूर्ण करणे, हा या निर्णयाचा उद्देश असल्याचे मानले जाते. बैठकीत घेतलेल्या आणखी एका महत्त्वाच्या निर्णयात, आयसीसीने सामना अधिकाऱ्यांना हॉक-आय तंत्रज्ञानाच्या डेटाचा वापर करण्याची परवानगी दिली आहे. जर गोलंदाजाच्या गोलंदाजीच्या शैलीबद्दल शंका असेल, तर सामना अधिकारी अहवाल तयार करताना किंवा अवैध गोलंदाजी शैलीच्या तपासाचा विचार करताना हॉक-आय डेटाचा वापर करू शकतील. यामुळे निर्णय प्रक्रिया अधिक वैज्ञानिक आणि अचूक होण्यास मदत होईल.

आयसीसी बोर्डाने कसोटी क्रिकेटमध्ये गुलाबी चेंडूच्या वापराच्या चाचण्यांनाही मंजुरी दिली आहे. ही चाचणी अशा परिस्थितीत घेतली जाईल जिथे अपुऱ्या प्रकाशामुळे खेळात व्यत्यय येण्याची शक्यता आहे. तथापि, गुलाबी चेंडूच्या वापरासाठी दोन्ही संघांची पूर्वसंमती आवश्यक असेल. आयसीसीचा विश्वास आहे की या निर्णयामुळे अपुऱ्या प्रकाशामुळे खेळ थांबण्याचे प्रमाण कमी होईल आणि अधिक षटके खेळता येतील.

आयसीसी बोर्डाचे हे निर्णय खेळाचे कामकाज अधिक आधुनिक, तंत्रज्ञान-आधारित आणि प्रेक्षक-स्नेही बनवण्याच्या दिशेने उचललेली महत्त्वपूर्ण पावले मानली जात आहेत. प्रशिक्षणाच्या नियमांमध्ये शिथिलता, तांत्रिक मदतीचा विस्तार आणि कसोटी क्रिकेटमध्ये गुलाबी चेंडूसह नवीन प्रयोग यांसारख्या निर्णयांचा भविष्यात आंतरराष्ट्रीय क्रिकेटवर दूरगामी परिणाम होऊ शकतो.

---------------

हिंदुस्थान समाचार / वृषाली देशपांडे