जोरहाट (आसाम), १३ जून (हिं.स.)आसाममधील जोरहाट येथील रौरिया हवाई तळावर भारतीय हवाई दलाचे (आयएएफ) एएन-३२ वाहतूक विमान कोसळले. प्राथमिक माहितीनुसार, विमान उतरताना कोसळले आणि त्यानंतर त्याला आग लागली.प्रत्यक्षदर्शींच्या मते, अपघातानंतर हवाई तळाच्या परिसरात आगीच्या मोठ्या ज्वाला आणि दाट धूर दिसत होता. कोसळलेले विमान हवाई दलाच्या ४३ स्क्वाड्रनचे होते आणि ते एका नियमित लष्करी मोहिमेवर होते. या विमानाचा उपयोग लष्करी साहित्य आणि रसद वाहून नेण्यासाठी केला जातो.

विमान नियोजित धावपट्टीवर सुरक्षितपणे उतरण्यात अयशस्वी ठरले आणि हवाई तळावरील गवताळ, असमान भागावर उतरले. उतरताना मोठा स्फोट झाल्यानंतर विमानाला आग लागली आणि त्याचे दोन तुकडे झाले. अपघातानंतर लगेचच हवाई तळावरील अग्निशमन दल आणि आपत्कालीन बचाव पथके घटनास्थळी दाखल झाली आणि त्यांनी आगीवर नियंत्रण मिळवले. प्रशासन आणि सुरक्षा यंत्रणांनी बचाव आणि मदतकार्य सुरू केले आहे. भारतीय हवाई दलाने या घटनेला दुजोरा दिला असून, जोरहाटमध्ये एक एएन-३२ विमान कोसळल्याचे म्हटले आहे. हवाई दलाने सांगितले की, या प्रकरणाची चौकशी सुरू असून, सविस्तर माहिती उपलब्ध होताच दिली जाईल.

सध्या, विमानातील कर्मचारी आणि इतर लष्करी जवानांच्या प्रकृतीबद्दल कोणतीही अधिकृत माहिती जाहीर करण्यात आलेली नाही. अपघाताचे कारण निश्चित करण्यासाठी सखोल चौकशी सुरू करण्यात आली आहे.

विशेष म्हणजे, जोरहाटमधील रौरिया हवाई तळ हा ईशान्य भारतातील भारतीय हवाई दलाचा एक महत्त्वाचा लष्करी तळ असून, तो या प्रदेशात हवाई कारवाया, लष्करी रसद पुरवठा आणि सामरिक कारवाया पार पाडण्यात महत्त्वपूर्ण भूमिका बजावतो.

---------------

हिंदुस्थान समाचार / वृषाली देशपांडे