रायगड, 02 जून (हिं.स.)। अलिबाग तालुक्यातील सहाण-पाल्हे बायपास मार्गावरील पाल्हे पुलाची अवस्था अत्यंत चिंताजनक बनली असून पुलाच्या बाजूची दगडी संरक्षक भिंत ढासळली आहे. अनेक ठिकाणी लोखंडी सळ्या उघड्यावर आल्याने पुलाच्या सुरक्षिततेबाबत गंभीर प्रश्न निर्माण झाले आहेत. पावसाळा तोंडावर आला असतानाही सार्वजनिक बांधकाम विभागाकडून ठोस उपाययोजना होत नसल्याचा आरोप स्थानिक नागरिकांनी केला आहे.

नागाव, रेवदंडा, मुरुड आणि श्रीवर्धनकडे जाण्यासाठी हा पूल महत्त्वाचा दुवा मानला जातो. गेल्या वर्षभरापासून पुलाच्या दुरुस्तीचे काम सुरू असल्याचे सांगितले जात असले तरी प्रत्यक्षात पुलावरील धोकादायक स्थितीत कोणतीही लक्षणीय सुधारणा झालेली नाही. विशेष म्हणजे, सार्वजनिक बांधकाम विभागाने १६ टनांवरील वाहनांना बंदी घालणारे फलक लावले असतानाही ३० ते ४० टन वजनाचे डंपर आणि इतर अवजड वाहने सर्रास या पुलावरून जात असल्याचे स्थानिकांचे म्हणणे आहे.

पुलाच्या दगडी भिंतीचे दगड निखळल्यामुळे आणि संरक्षक कठडे कोसळल्यामुळे पुलाच्या मजबुतीवर प्रश्नचिन्ह निर्माण झाले आहे. अवजड वाहनांमुळे सतत होणारे कंपन आणि पावसाळ्यातील वेगवान पाण्याचा प्रवाह यामुळे पुलाला आणखी धोका निर्माण होऊ शकतो, अशी भीती व्यक्त केली जात आहे.

सामाजिक कार्यकर्ते ॲड. राकेश नारायण पाटील यांनी सार्वजनिक बांधकाम विभागाच्या कारभारावर तीव्र नाराजी व्यक्त केली आहे. वर्षभर दुरुस्ती सुरू असल्याचे सांगितले जात असताना जबाबदार अधिकाऱ्यांनी प्रत्यक्ष स्थळपाहणी केली का, असा सवाल त्यांनी उपस्थित केला आहे. सुधागड तालुक्यातील आमणोली पूल कोसळल्याच्या घटनेचा संदर्भ देत पाल्हे पुलाबाबतही वेळेत उपाययोजना न झाल्यास गंभीर दुर्घटना घडू शकते, असा इशारा त्यांनी दिला.

पुलाची तातडीने तांत्रिक तपासणी करून अवजड वाहतुकीवर कठोर निर्बंध आणावेत, अन्यथा संभाव्य दुर्घटनेसाठी संबंधित अधिकाऱ्यांनाच जबाबदार धरावे, अशी मागणी स्थानिक नागरिकांकडून होत आहे.

---------------

हिंदुस्थान समाचार / संदेश साळुंके (रायगड)