रायगड, 24 जून (हिं.स.)। : हैदराबाद येथे सुरू असलेल्या 48 व्या पुरुष व महिला ज्युनियर तसेच मुला-मुलींच्या सब-ज्युनियर राष्ट्रीय इक्विप्ड पॉवरलिफ्टिंग स्पर्धेत कर्जतच्या गायत्री महेश बडेकर हिने शानदार कामगिरी करत सुवर्णपदक पटकावले आहे. तिच्या या यशामुळे कर्जत तालुक्याचे नाव राष्ट्रीय स्तरावर उज्ज्वल झाले आहे.

तेलंगणातील गाचीबोवली स्टेडियम येथे 23 ते 28 जून 2026 दरम्यान होत असलेल्या या स्पर्धेत IND Weightlifting and Powerlifting Club, Karjat, Raigad तर्फे सहभागी झालेल्या गायत्रीने 47 किलो वजनी गटात आपले वर्चस्व सिद्ध केले. तिने एकूण 378.5 किलो वजन उचलत दोन राष्ट्रीय विक्रमांची नोंद केली आणि सुवर्णपदकावर आपले नाव कोरले.

राष्ट्रीय स्तरावरील या उल्लेखनीय यशामुळे गायत्रीवर अभिनंदनाचा वर्षाव होत आहे. तिच्या कठोर परिश्रम, सातत्यपूर्ण सराव आणि जिद्दीच्या बळावर तिने ही उल्लेखनीय कामगिरी साध्य केली आहे. प्रशिक्षक, कुटुंबीय, सहकारी खेळाडू आणि क्रीडाप्रेमींनी तिचे कौतुक करत पुढील वाटचालीसाठी शुभेच्छा दिल्या आहेत.

गायत्रीच्या या यशामुळे कर्जत तालुक्यातील युवा खेळाडूंना प्रेरणा मिळाली असून पॉवरलिफ्टिंग क्षेत्रात आणखी खेळाडू घडण्यास निश्चितच चालना मिळणार आहे. भविष्यात आंतरराष्ट्रीय स्पर्धांमध्येही ती देशाचे प्रतिनिधित्व करून आणखी यश संपादन करेल, असा विश्वास व्यक्त केला जात आहे.

---------------

हिंदुस्थान समाचार / संदेश साळुंके (रायगड)