चंद्रपूर, 13 जुलै (हिं.स.) : राम मंदिर देणगी घोटाळ्याच्या आरोपांच्या निष्पक्ष चौकशीच्या मागणीसाठी चंद्रपुरात काँग्रेसच्या वतीने ‘रघुपती राघव राजाराम सत्याग्रह’ आंदोलन करण्यात आले. ऐतिहासिक अंचलेश्वर मंदिर परिसरात झालेल्या या आंदोलनात खासदार प्रतिभा धानोरकर यांनी प्रत्यक्ष सहभागी होत प्रकरणाची सखोल चौकशी करण्याची मागणी केली.
मर्यादा पुरुषोत्तम प्रभू श्रीराम यांच्या नावाचा वापर करून कोणताही आर्थिक गैरव्यवहार होऊ नये, तसेच संबंधित प्रकरणातील सत्य समोर यावे, या मागणीसाठी काँग्रेसने हे आंदोलन केल्याचे यावेळी सांगण्यात आले.
आंदोलनादरम्यान काँग्रेस कमिटीच्या पदाधिकाऱ्यांनी प्रशासनावर गंभीर आरोप करत या प्रकरणाची पारदर्शक चौकशी करण्याची मागणी केली. खासदार प्रतिभा धानोरकर यांनी स्वतः भजन गायले. त्यानंतर आंदोलनाच्या वतीने स्थानिक ठाणेदारांना सविस्तर निवेदन देण्यात आले.
यावेळी बोलताना खासदार प्रतिभा धानोरकर म्हणाल्या की, भारतातील कोट्यवधी नागरिकांच्या धार्मिक भावना आणि श्रद्धा प्रभू श्रीरामांशी जोडलेल्या आहेत. त्यामुळे श्रीरामांच्या नावाशी संबंधित प्रत्येक व्यवहारात पूर्ण पारदर्शकता असणे आवश्यक आहे. जनभावनांशी कोणालाही खेळू दिले जाणार नाही.
जोपर्यंत या प्रकरणातील सत्य समोर येत नाही आणि दोषींवर कारवाई होत नाही, तोपर्यंत लोकशाही मार्गाने आंदोलन सुरूच ठेवण्यात येईल, असा निर्धार त्यांनी व्यक्त केला.
-------------------------
हिंदुस्थान समाचार / एम.पंकजराव
14 Jul 2026
