रायगड, 13 जुलै (हिं.स.)। रायगड महसूल विभागातील प्रलंबित प्रश्नांचा जलद, पारदर्शक आणि लोकाभिमुख पद्धतीने निपटारा करण्यासाठी महाराष्ट्र शासनातर्फे 'छत्रपती शिवाजी महाराज महाराजस्व समाधान शिबिर अभियान' राबविण्यात येणार आहे. रायगड जिल्ह्यात हे अभियान २२ ते २९ जुलै २०२६ या कालावधीत आयोजित करण्यात आले असून नागरिकांना महसूल विभागाच्या विविध सेवा त्यांच्या गावाजवळच उपलब्ध करून दिल्या जाणार आहेत.
महसूल मंत्री तथा अभियानाचे अध्यक्ष चंद्रशेखर बावनकुळे यांच्या मार्गदर्शनाखाली हे अभियान राबविण्यात येत आहे. दिवंगत अजित पवार यांच्या जयंतीनिमित्त तसेच मुख्यमंत्री देवेंद्र फडणवीस यांच्या वाढदिवसानिमित्त राज्यभर हा जयंती सप्ताह उपक्रम आयोजित करण्यात आला आहे.
या शिबिरांमध्ये ७/१२ उतारे, विविध दाखल्यांचे वितरण, वारस नोंद, फेरफार, नाव दुरुस्ती, जमिनीचे वर्गबदल, पीक पाहणी, नैसर्गिक आपत्ती पंचनामे, पीक कर्जमाफीसंदर्भातील प्रकरणे, डिजिटल स्वाक्षरीचे ७/१२, जात, उत्पन्न, रहिवासी, नॉन-क्रिमिलिअर, विद्यार्थी दाखले, जमीन मोजणी अर्ज, अकृषिक (एनए) मार्गदर्शन तसेच विविध महसुली योजनांची माहिती व लाभ उपलब्ध करून दिला जाणार आहे. शेतकऱ्यांसाठी जमीन मोजणी, शेतरस्ते, बांधबंदिस्ती, सर्व्हे प्रकरणे आणि नुकसानभरपाईबाबतही विशेष मार्गदर्शन केले जाणार आहे.
२२ जुलै रोजी जिल्ह्यातील सातही विधानसभा मतदारसंघांमध्ये सार्वजनिक शिबिरांचे आयोजन करण्यात आले आहे. रायगडातील नागरिकांनी या शिबिरांचा लाभ घेऊन महसूल विभागाशी संबंधित प्रलंबित प्रश्नांचा तातडीने निपटारा करून घ्यावा, असे आवाहन प्रभारी जिल्हाधिकारी प्रमोद जाधव यांनी केले आहे.
---------------
हिंदुस्थान समाचार / संदेश साळुंके (रायगड)
14 Jul 2026
