आगामी २० जुलै रोजी पी.एन.पी. नाट्यगृहात सांस्कृतिक कार्यक्रमाचे आयोजन

रायगड, 16 जुलै (हिं.स.) : महाराष्ट्र शासनाच्या सांस्कृतिक कार्य विभागांतर्गत सांस्कृतिक कार्य संचालनालय, महाराष्ट्र राज्य, मुंबई यांच्या वतीने संत ज्ञानेश्वर माऊली यांच्या ७५० व्या जयंती वर्षानिमित्त ‘ज्ञानियांचा राजा’ या संकल्पनेवर आधारित ‘मोगरा फुलला’ या आध्यात्मिक आणि सांस्कृतिक कार्यक्रमाचे आयोजन करण्यात आले आहे. हा कार्यक्रम आगामी २० जुलै रोजी सायंकाळी ५.३० वाजता अलिबाग येथील पी.एन.पी. नाट्यगृहात होणार आहे.

संत ज्ञानेश्वर महाराजांच्या विचारांचा, वारकरी संप्रदायाच्या समृद्ध परंपरेचा आणि महाराष्ट्राच्या आध्यात्मिक-सांस्कृतिक वैभवाचा जागर घडविणारा हा कार्यक्रम रसिकांसाठी विशेष आकर्षण ठरणार आहे. संतसाहित्य, अभंग, भक्तीपर संदेश आणि सांस्कृतिक सादरीकरणाच्या माध्यमातून ज्ञानेश्वर माऊलींचे जीवनकार्य, तत्त्वज्ञान आणि समाजप्रबोधनाचे विचार जनमानसापर्यंत पोहोचविण्याचा प्रयत्न या कार्यक्रमातून करण्यात येणार आहे.

या कार्यक्रमाचे प्रमुख सादरकर्ते व्याख्याते तथा स्वास्थ्य व समाज विषयक प्रबोधनकार श्री. गणेश शिंदे हे असून, ते संत ज्ञानेश्वरांच्या जीवनकार्याचा, वारकरी परंपरेतील आध्यात्मिक संदेशाचा आणि भक्ती चळवळीच्या सामाजिक योगदानाचा प्रभावी उलगडा आपल्या सादरीकरणातून करणार आहेत.

संत ज्ञानेश्वरांच्या ७५० व्या जयंती वर्षानिमित्त आयोजित हा भक्तिमय आणि सांस्कृतिक सोहळा सर्व वयोगटातील नागरिकांसाठी प्रेरणादायी ठरणार आहे. नागरिकांनी मोठ्या संख्येने उपस्थित राहून या भक्तीमय कार्यक्रमाचा लाभ घ्यावा, असे आवाहन सांस्कृतिक कार्य संचालनालय, महाराष्ट्र राज्य, मुंबई यांच्या वतीने करण्यात आले आहे.

----------------------

हिंदुस्थान समाचार / संदेश साळुंके (रायगड)