लातूर, 17 जुलै, (हिं.स.)। उदगीर शहर पोलीस ठाण्याच्या दामिनी पथकाच्या वतीने विद्यार्थ्यांमध्ये सुरक्षा विषयक जनजागृती करण्यासाठी संग्राम स्मारक विद्यालय व जमहूर उर्दू शाळा येथे विशेष मार्गदर्शन कार्यक्रम घेण्यात आला. यावेळी महिला पोलीस अंमलदार सोनाली ढगे, पोलीस अंमलदार शिंदे व गोपनीय अंमलदार काळे यांनी विद्यार्थ्यांना महिला व बालक सुरक्षा, 'गुड टच बॅड टच', सायबर गुन्ह्यांपासून बचाव, सोशल मीडियाचा सुरक्षित व जबाबदारीने वापर, वाहतूक नियमांचे पालन तसेच आपत्कालीन मदत क्रमांक ११२ याबाबत सविस्तर माहिती दिली.

तसेच कायद्याचे पालन करून सुरक्षित, सजग व जबाबदार नागरिक म्हणून वावरण्याचे महत्त्वही विद्यार्थ्यांना सम जावून सांगण्यात आले. कार्यक्रमादरम्यान विद्यार्थ्यांनी उत्स्फूर्त प्रतिसाद देत विविध प्रश्न विचारले. पोलिसांनी त्यांच्या शंकांचे समाधान करत आवश्यक मार्गदर्शन केले. विद्यार्थ्यांमध्ये सुरक्षा व कायदेविषयक जागरूकता निर्माण करण्याच्या उद्देशाने आयोजित करण्यात आलेल्या या उपक्रमाचे शिक्षक, विद्यार्थी आणि पालकांनी स्वागत केले.

---------------

हिंदुस्थान समाचार / Mahesh Madanrao Chitnis