रायगड, 20 जुलै (हिं.स.)। : ॲक्वाटिक असोसिएशन ऑफ रायगड आणि स्व. नमिता नाईक क्रीडा संकुल यांच्या संयुक्त विद्यमाने, तसेच अलिबाग नगर परिषदेच्या सहकार्याने आयोजित 'नगराध्यक्ष चषक' जिल्हास्तरीय जलतरण स्पर्धेला रायगड जिल्ह्यातील जलतरणपटूंचा उत्स्फूर्त प्रतिसाद लाभला. दिवसभर रंगलेल्या या स्पर्धेत विविध वयोगटांतील ८२ गुणवंत जलतरणपटूंना पदके आणि प्रमाणपत्रे देऊन गौरविण्यात आले.

स्पर्धेचा उद्देश केवळ विजेते निश्चित करणे नसून जिल्ह्यातील होतकरू खेळाडूंना राज्य व राष्ट्रीय स्तरावरील स्पर्धांसाठी सक्षम व्यासपीठ उपलब्ध करून देणे हा होता. रायगडातील विविध तालुक्यांतील शेकडो जलतरणपटूंनी फ्रीस्टाईल, बॅकस्ट्रोक, ब्रेस्टस्ट्रोक आणि बटरफ्लाय प्रकारात उल्लेखनीय कामगिरी करत जिल्ह्यातील जलतरणाचा वाढता दर्जा अधोरेखित केला.

स्पर्धेत गट-२ (२०१२) मधील तनिष शिंदे याने ५० मीटर फ्रीस्टाईल आणि ५० मीटर बॅकस्ट्रोकमध्ये सुवर्णपदके, तर ५० मीटर ब्रेस्टस्ट्रोक आणि ५० मीटर बटरफ्लायमध्ये रौप्यपदके मिळवून उत्कृष्ट कामगिरी केली. खुल्या महिला गटात रुद्राशी टेमकर हिने चारही प्रकारांत सुवर्णपदके पटकावत स्पर्धेचे प्रमुख आकर्षण ठरली.

पारितोषिक वितरण समारंभ नगरसेवक अनिल चोपडा, नगरसेवक सागर भगत, नगरसेविका अश्विनी ठोसर, पोलीस अधिकारी किशोर साळे, प्रशासकीय अधिकारी श्रद्धा नवले, प्रियांका वाघ, राष्ट्रीय जलतरणपटू व प्रशिक्षक दिलीप वैद्य तसेच प्रशिक्षक दत्ता तरे यांच्या हस्ते पार पडला.

यावेळी मान्यवरांनी नियमित सराव, शिस्त आणि क्रीडाभावना जोपासण्याचे आवाहन करत खेळाडूंना उज्ज्वल भविष्यासाठी शुभेच्छा दिल्या. अलिबागमधील आधुनिक जलतरण सुविधा आणि नगराध्यक्षा अक्षया प्रशांत नाईक तसेच वीज व बांधकाम सभापती प्रशांत नाईक यांच्या पुढाकारामुळे जिल्ह्यातील ग्रामीण भागातील खेळाडूंना दर्जेदार स्पर्धा व प्रगतीच्या अधिक संधी उपलब्ध होत असल्याची भावना उपस्थितांनी व्यक्त केली.

---------------

हिंदुस्थान समाचार / संदेश साळुंके (रायगड)