लातूर, 27 जुलै (हिं.स.) : केंद्रीय राखीव पोलीस दलाच्या (सीआरपीएफ) ८८ व्या स्थापना दिनानिमित्त लातूर येथील नवआरक्षी प्रशिक्षण केंद्रात विविध कार्यक्रमांचे आयोजन करण्यात आले. कार्यक्रमाची सुरुवात राष्ट्राची एकता, अखंडता आणि अंतर्गत सुरक्षेसाठी सर्वोच्च बलिदान देणाऱ्या सीआरपीएफच्या अमर शहीदांना श्रद्धांजली अर्पण करून झाली.

या कार्यक्रमाला पोलीस दलातील अधिकारी, जवान, नवप्रविष्ट आरक्षी तसेच त्यांच्या कुटुंबीयांची मोठ्या संख्येने उपस्थिती होती.

यावेळी पोलीस उपमहानिरीक्षक तथा आरटीसीचे प्राचार्य अमीरुल हसन अन्सारी यांनी उपस्थितांना मार्गदर्शन केले. त्यांनी सीआरपीएफच्या गौरवशाली परंपरा, अदम्य शौर्य, शिस्त, कर्तव्यनिष्ठा आणि राष्ट्रसेवेप्रती असलेल्या अखंड बांधिलकीचा गौरव करत देशाच्या अंतर्गत सुरक्षेसाठी दलाने दिलेल्या उल्लेखनीय योगदानावर प्रकाश टाकला.

केंद्रीय राखीव पोलीस दल हे देशाच्या अंतर्गत सुरक्षेचे प्रमुख बल असून दहशतवादविरोधी कारवाया, नक्षलविरोधी मोहिमा, शांततापूर्ण निवडणुका पार पाडणे, कायदा व सुव्यवस्था राखणे तसेच नैसर्गिक आपत्तीच्या काळात मदत व बचावकार्य करण्यामध्ये सीआरपीएफ नेहमीच महत्त्वपूर्ण भूमिका बजावत असल्याचे त्यांनी सांगितले.

स्थापना दिनानिमित्त अधिकारी व जवानांमध्ये संघभावना, परस्पर समन्वय आणि क्रीडा संस्कृतीला चालना देण्यासाठी व्हॉलीबॉल स्पर्धेचेही आयोजन करण्यात आले. स्पर्धेत सर्व खेळाडूंनी उत्साहाने सहभाग घेत उत्कृष्ट क्रीडाभावना, शिस्त आणि संघभावनेचे दर्शन घडविले. यावेळी विजेत्या आणि उपविजेत्या संघांचा गौरव करण्यात आला.

---------------------

हिंदुस्थान समाचार / Mahesh Madanrao Chitnis