अम्स्टेलवीन, 21 ऑगस्ट (हिं.स.)। एफआयएच हॉकी विश्वचषक बेल्जियम-नेदरलँड्स 2026 च्या दुसऱ्या टप्प्यात भारतीय पुरुष आणि महिला संघांसमोर ऑलिम्पिक विजेता नेदरलँड्सचे कडवे आव्हान असेल. दोन्ही भारतीय संघांनी आपापल्या पूलमध्ये दुसरे स्थान मिळवत दुसऱ्या टप्प्यात प्रवेश केला आहे.

आज नेदरलँड्सशी भिडणार महिला संघ

भारतीय महिला संघ शुक्रवारी रात्री 9:30 वाजता अम्स्टेलवीनच्या वागेनर स्टेडियममध्ये पूल ईच्या सामन्यात यजमान नेदरलँड्सचा सामना करेल. भारताने पहिल्या टप्प्यात दक्षिण आफ्रिकेचा 6-1 असा पराभव केला, तर इंग्लंडविरुद्धचा सामना गोलशून्य बरोबरीत राहिला. त्यापूर्वी चीनविरुद्धही भारताने बरोबरी साधली होती.भारत आणि चीन यांच्यातील बरोबरीमुळे दोन्ही संघांच्या खात्यात प्रत्येकी एक गुण आहे, जो दुसऱ्या टप्प्यात महत्त्वाचा ठरू शकतो. पूल ई आणि एफमधील अव्वल दोन संघ उपांत्य फेरीत प्रवेश करतील.

नेदरलँड्सनंतर भारतीय महिला संघ 23 ऑगस्ट रोजी रात्री 10:30 वाजता ऑस्ट्रेलियाविरुद्ध खेळेल.

पुरुष संघासमोरही नेदरलँड्स

भारतीय पुरुष संघ 22 ऑगस्ट रोजी संध्याकाळी 7:30 वाजता नेदरलँड्सविरुद्ध दुसऱ्या टप्प्यातील आपला पहिला सामना खेळेल. त्यानंतर 24 ऑगस्ट रोजी संध्याकाळी 6:15 वाजता अर्जेंटिनाशी सामना होईल.मात्र पुरुष संघ दुसऱ्या टप्प्यात एकही गुण सोबत घेऊन जाणार नाही. पूल डीमध्ये इंग्लंडने भारताचा 4-2 असा पराभव करून अव्वल स्थान मिळवले आणि तो एक गुण घेऊन पुढे गेला आहे.

भारताने वेल्सचा 3-1 असा पराभव करून आपल्या अभियानाची सुरुवात केली होती आणि त्यानंतर पाकिस्तानचा 5-3 असा पराभव करून पूलमध्ये दुसरे स्थान मिळवले.

उपांत्य फेरीचा मार्ग असेल आव्हानात्मक

नेदरलँड्सने पॅरिस ऑलिम्पिक 2024 मध्ये पुरुष आणि महिला अशा दोन्ही गटांत सुवर्णपदक जिंकले आहे. त्यामुळे दोन्ही भारतीय संघांसाठी यजमान संघाविरुद्धचा सामना अत्यंत आव्हानात्मक असेल. भारतीय महिला संघाने आतापर्यंत आक्रमक आणि बचावात्मक खेळामध्ये चांगला समतोल दाखवला आहे, तर पुरुष संघाने पाकिस्तानविरुद्धच्या शानदार विजयासह पहिल्या टप्प्याचा समारोप केला. आता दोन्ही संघांना दुसऱ्या टप्प्यात नव्याने सुरुवात करावी लागेल. उपांत्य फेरीच्या शर्यतीत कायम राहण्यासाठी नेदरलँड्सविरुद्ध मजबूत सुरुवात करणे भारतासाठी अत्यंत महत्त्वाचे ठरेल.

---------------

हिंदुस्थान समाचार / Suraj Chaugule