लुसाने (स्वित्झर्लंड), 22 ऑगस्ट (हिं.स.)भारताचा नीरज चोप्रा लुसाने डायमंड लीग २०२६ च्या पुरुष भालाफेक स्पर्धेत दुसऱ्या स्थानी राहिला. तो पुन्हा एकदा श्रीलंकेच्या फॉर्मात असलेल्या रोमेश पाथिरागेच्या मागे पडला. नीरजची ८८.०५ मीटरची सर्वोत्तम कामगिरी रोमेश पाथिरागेच्या ८८.१४ मीटरच्या सर्वोत्तम कामगिरीपेक्षा केवळ ०.०९ मीटरने कमी होती. पहिल्या फेरीनंतर पाथिरागे आघाडीवर होता, पण दुसऱ्या फेरीत नीरजने आघाडी घेतली. पण, पाथिरागेने तिसऱ्या फेरीत पुन्हा आघाडी मिळवली आणि शेवटपर्यंत ती कायम ठेवली.

ग्रेनेडाचा अँडरसन पीटर्स ८६.६९ मीटरच्या सर्वोत्तम कामगिरीसह तिसऱ्या स्थानी राहिला. नीरज आणि पीटर्स या दोघांनीही या हंगामातील आपली सर्वोत्तम कामगिरी केली. पण त्यांची कामगिरी राष्ट्रकुल क्रीडा स्पर्धा २०२६ चा सुवर्णपदक विजेता पाथिरागेला सलग तिसऱ्यांदा डायमंड लीग स्पर्धा जिंकण्यापासून रोखण्यासाठी पुरेशी ठरली नाही.

अव्वल ३ खेळाडूंची कामगिरी

रुमेश पाथिरागे (श्रीलंका) - सर्वोत्तम फेक ८८.१४ मीटर

नीरज चोप्रा (भारत) - सर्वोत्तम फेक ८८.०५ मीटर (हंगामातील सर्वोत्तम फेक)

अँडरसन पीटर्स (ग्रेनेडा) - सर्वोत्तम फेक ८६.६९ मीटर

नीरज चोप्राने आपल्या दुसऱ्या प्रयत्नात ८८.०५ मीटर भाला फेकला, जी त्याची हंगामातील सर्वोत्तम फेकही होती, परंतु नीरज श्रीलंकेच्या रुमेश पाथिरागेच्या फेकीला मागे टाकू शकला नाही. नीरज पाथिरागेपेक्षा केवळ ९ सेंटीमीटर मागे राहिला. पाथिरागेने ८८.१४ मीटरची सर्वोत्तम फेक करून लुसाने डायमंड लीगचे विजेतेपद यशस्वीरित्या पटकावले.

नीरज चोप्राने लुसाने डायमंड लीगमध्ये ८८.०५ मीटरची आपली 'हंगामातील सर्वोत्तम' फेक केली. हा त्याचा सलग सहावा हंगाम आहे ज्यात त्याने ८८ मीटरपेक्षा जास्त भालाफेक केली आहे, ज्यामुळे नीरज भालाफेकीच्या इतिहासात सलग सर्वाधिक वेळा ८८ मीटरपेक्षा जास्त भालाफेक करणारा संयुक्तपणे दुसरा खेळाडू ठरला आहे.

नॉर्वेचा अँड्रियास थोरकिल्डसेन सलग सात हंगामांसह (२००५-११) या यादीत अव्वल स्थानी आहे, तर चेक प्रजासत्ताकचा दिग्गज खेळाडू जॅन झेलेझनी (१९९२-९७), जर्मनीचा योहान्स वेटर (२०१६-२१) आणि भारताचा नीरज चोप्रा (२०२१-२६) हे एकमेव खेळाडू आहेत ज्यांनी सलग सहा हंगामांमध्ये ८८ मीटरपेक्षा जास्त भालाफेक केली आहे.

---------------

हिंदुस्थान समाचार / वृषाली देशपांडे