मॅके (ऑस्ट्रेलिया), 22 ऑगस्ट (हिं.स.) बांग्लादेशविरुद्धच्या दुसऱ्या कसोटीच्या पहिल्या दिवशी ऑस्ट्रेलियाने माफ आघाडी घेतली. दिवसाचा खेळ संपला तेव्हा ऑस्ट्रेलियाने आपल्या पहिल्या डावात 8 गडी गमावून १६५ धावा केल्या होत्या आणि १०१ धावांची आघाडी घेतली होती. दिवसाचा खेळ संपला तेव्हा कॅमेरॉन ग्रीन ५१ धावांवर आणि नॅथन लायन १० धावांवर खेळपट्टीवर होते. तत्पूर्वी, दुसऱ्या सत्रात बांगलादेशचा पहिला डाव ६४ धावांवर सर्वबाद झाला होता. पण, शोरिफुल इस्लामने ऑस्ट्रेलियाला एकापाठोपाठ एक धक्के देत संघाला पुनरागमन करण्यास मदत केली.

ऑस्ट्रेलियन फलंदाजांकडून निराशा

बांग्लादेशला स्वस्तात बाद केल्यानंतर ऑस्ट्रेलियाची सुरुवात खराब झाली. शोरिफुल इस्लामने ऑस्ट्रेलियाला एकापाठोपाठ एक धक्के देत त्यांचा डाव डगमगवला.सुरुवातीच्या धक्क्यांनंतर, स्टीव्ह स्मिथ आणि कॅमेरॉन ग्रीन यांनी ऑस्ट्रेलियाचा डाव सावरला आणि संघाला आघाडी मिळवून दिली.स्मिथ ४२ धावांवर बाद झाला आणि त्याची ग्रीनसोबतची भागीदारी तुटली.एका बाजूने विकेट्स पडतच राहिल्या, पण ग्रीनने खेळपट्टीवर टिकून आपले अर्धशतक पूर्ण केले.बांग्लादेशकडून शोरिफुलने सहा बळी घेतले, तर तस्किन अहमद आणि मेहिदी हसन मिराज यांनी प्रत्येकी एक बळी घेतला.

मिचेल स्टार्कचा भेद मारा

तत्पूर्वी, ऑस्ट्रेलियाने नाणेफेक जिंकून प्रथम गोलंदाजी करण्याचा निर्णय घेतला. वेगवान गोलंदाज मिचेल स्टार्कने बांगलादेशला एकापाठोपाठ एक धक्के देत आपला निर्णय योग्य ठरवला. पहिल्याच सत्रात बांगलादेशच्या सहा विकेट्स पडल्या. मिचेल स्टार्कने पहिल्या डावात उत्कृष्ट गोलंदाजी करत सुरुवातीपासूनच बांगलादेशवर दबाव टाकला. स्टार्कने पहिल्याच चेंडूवर शादमन इस्लामला बाद केले आणि त्यानंतर पुढच्याच षटकाच्या पहिल्याच चेंडूवर तन्झिद हसन तमीमला खाते न उघडता बाद केले. पुढच्याच चेंडूवर नाझमुल होसेन शांतो स्टार्कचा तिसरा बळी ठरला. मात्र, स्टार्कला आपली हॅट-ट्रिक पूर्ण करता आली नाही. त्यानंतर स्टार्कने मोमिनुल हकचा कॅमेरॉन ग्रीनकरवी झेल घेतला, जो नऊ धावांवर बाद झाला. स्टार्कचा पाचवा बळी लिटन दास होता, जो एकही बळी न घेता बाद झाला. बांगलादेशची फलंदाजी इतकी खराब होती की चार फलंदाजांना आपले खातेही उघडता आले नाही.

पहिल्या सत्रात कांगारुंचे वर्चस्व

स्टार्कने बांगलादेशचा डाव खिळखिळा करण्यासाठी कोणतीही कसर सोडली नाही. स्टार्कसमोर बांगलादेशची फलंदाजी पत्त्यांच्या घराप्रमाणे कोसळली. त्यानंतर पॅट कमिन्सने मुशफिकुर रहीमला बाद करून पहिल्या सत्रात बांगलादेशला सहावा धक्का दिला. बांगलादेशने २१ धावांत सहा गडी गमावले. दुपारच्या जेवणापर्यंत बांगलादेशची धावसंख्या ३५ धावांवर सहा गडी अशी होती.

कमिन्स आणि हेझलवूडने बांग्लादेशला रोखले

दुसऱ्या सत्रात जोश हेझलवूड आणि कमिन्सने आपली ताकद दाखवत प्रत्येकी दोन बळी घेतले आणि बांगलादेशला आणखी अडचणीत आणले. कमिन्सने प्रथम मेहिदी हसन मिराजला ११ धावांवर बाद केले आणि त्यानंतर हेझलवूडने हसन महमूदला १० धावांवर बाद केले. त्यानंतर कमिन्सने मॅट रेनशॉकरवी झेलबाद करून तस्किन अहमदचा डाव संपवला. तस्किन एका धावेवर बाद झाला. तथापि, ऑस्ट्रेलियाला शेवटची विकेट घेण्यासाठी थोडी जास्त मेहनत करावी लागली, कारण तैजुल इस्लाम आणि शोरिफुल इस्लाम यांनी १०व्या विकेटसाठी २५ धावांची भागीदारी केली. ही बांगलादेशच्या डावातील सर्वोच्च भागीदारी होती. स्टार्कने शोरिफुलला बाद करून ही भागीदारी तोडली. ११व्या क्रमांकावर फलंदाजीला आलेल्या शोरिफुलने पहिल्या डावात बांगलादेशसाठी सर्वाधिक १४ धावा केल्या होत्या. ऑस्ट्रेलियाकडून स्टार्कने सहा, कमिन्सने तीन आणि हेझलवूडने एक विकेट घेतली.

---------------

हिंदुस्थान समाचार / वृषाली देशपांडे