रत्नागिरी, 22 ऑगस्ट (हिं.स.) । गणेशोत्सवाच्या आगमनाला अवघे काही दिवस शिल्लक राहिल्याने मूर्तिकारांच्या कार्यशाळांमध्ये सध्या लगबग वाढली आहे. गणरायाच्या विविध रूपांना आकार देण्यासाठी मूर्तिकार अहोरात्र परिश्रम घेत आहेत.

गणेशमूर्ती घडविण्याच्या प्रक्रियेला वेग आला असून, मातीपासून मूर्ती तयार करण्यापासून ती सुकवणे, रंगकाम आणि सजावटीपर्यंतची कामे युद्धपातळीवर सुरू आहेत. घरगुती गणपतींपासून सार्वजनिक मंडळांच्या मोठ्या मूर्तींपर्यंत विविध आकारांच्या मूर्ती तयार केल्या जात आहेत.

प्रत्येक मूर्ती अधिक आकर्षक आणि सुबक दिसावी, यासाठी मूर्तिकार बारकाव्यांकडे विशेष लक्ष देत आहेत. मूर्तीच्या चेहऱ्यावरील भाव, मुकुट, दागिने, वस्त्रांची रचना आणि रंगसंगती यावर काळजीपूर्वक काम केले जात आहे. अनेक दिवसांच्या मेहनतीनंतर आकार घेणारे गणरायाचाे हा रूप पाहण्यासाठी नागरिक मूर्तिशाळांमध्ये वळत आहेत.

दरम्यान, गणेशोत्सवाच्या पार्श्वभूमीवर नागरिकांनीही घरांची साफसफाई, सजावट आणि पूजेच्या साहित्याची तयारी सुरू केली आहे. बाजारपेठेतही गणेशोत्सवाशी संबंधित साहित्याची खरेदी-विक्री वाढू लागली आहे.

---------------

हिंदुस्थान समाचार / रत्नागिरी