जळगाव, 22 ऑगस्ट (हिं.स.) कर्जाची रक्कम व्याजासह पूर्णपणे फेडल्यानंतरही तारण ठेवलेली शेतजमीन परत न केल्याचा धक्कादायक प्रकार रावेर तालुक्यातील कुंभारखेडा परिसरातून समोर आला आहे. एवढेच नव्हे, तर व्याजाच्या नावाखाली आणखी एक शेतजमीन खरेदी करून घेतल्याचा आरोप करण्यात आला असून या प्रकरणी सावदा पोलिसांनी बेकायदेशीर सावकारी केल्याच्या आरोपावरून एका व्यक्तीविरुद्ध गुन्हा दाखल केला आहे. कुंभारखेडा येथील मंदाबाई मनोहर पाटील यांनी याबाबत जिल्हा उपनिबंधक, सहकारी संस्था, जळगाव यांच्याकडे तक्रार केली होती. तक्रारीची चौकशी झाल्यानंतर सहकारी संस्था रावेरचे सहाय्यक निबंधक प्रदीप माधवराव महाजन यांनी शासकीय फिर्याद दाखल केली. त्यानंतर सावदा पोलीस ठाण्यात संबंधिताविरुद्ध कायदेशीर कारवाई करण्यात आली.
तक्रारीनुसार, मंदाबाई पाटील यांचे पती कै. मनोहर प्रल्हाद पाटील यांनी सावदा येथील नंदकुमार मुकुंदा पाटील (६०) यांच्याकडून व्याजाने कर्ज घेतले होते. कर्जाच्या हमीसाठी त्यांच्या शेतजमिनीचे खरेदीखत करून देण्यात आल्याचे तक्रारीत नमूद करण्यात आले आहे. कर्जाची संपूर्ण रक्कम आणि त्यावरील व्याज फेडल्यानंतर संबंधित जमीन परत मिळणे अपेक्षित होते. मात्र, जमीन परत करण्यास टाळाटाळ करण्यात आल्याचा आरोप आहे. याचबरोबर कर्जाच्या व्याजाच्या बदल्यात आणखी एक शेतजमीन खरेदी करून घेतल्याचेही तक्रारीत म्हटले आहे. या तक्रारीनंतर सहकारी संस्था विभागाने संपूर्ण प्रकरणाची चौकशी केली. चौकशीदरम्यान संबंधित व्यक्तीकडे सावकारी व्यवसायासाठी आवश्यक वैध परवाना नसल्याचे निष्पन्न झाल्याचे पोलिसांनी सांगितले.
चौकशीतील निष्कर्षांच्या आधारे जिल्हा उपनिबंधक, सहकारी संस्था, जळगाव यांनी कारवाईचे आदेश दिले. या आदेशानंतर सावदा पोलीस ठाण्यात गुन्हा दाखल करण्यात आला आहे.
---------------
हिंदुस्थान समाचार / मनोहर कांडेकर