छत्रपती संभाजीनगर, २४ ऑगस्ट (हिं.स.) : जिल्हा ग्रंथालय अधिकारी कार्यालयाच्या इमारतीबाबत उपस्थित करण्यात आलेल्या विविध मुद्द्यांवर कार्यालयाकडून खुलासा करण्यात आला आहे. कार्यालयाची इमारत नियमितपणे स्वच्छ करण्यात येत असून, छताला गळती होत नसल्याचे स्पष्ट करण्यात आले आहे.

स्वच्छतेच्या अनुषंगाने कार्यालयाची दर आठवड्याला शनिवार आणि रविवारी स्वच्छता केली जाते. पहिल्या मजल्यावरील स्वच्छतागृह वापरात नसले तरी ते दर महिन्याला स्वच्छ करण्यात येते, असे कार्यालयाने स्पष्ट केले आहे.

कार्यालयाच्या भिंतींना पडलेल्या तड्यांची बाब सार्वजनिक बांधकाम विभागाच्या निदर्शनास आणून देण्यात आली आहे. तसेच कार्यालयातील जुन्या फर्निचरचे निर्लेखन करण्याची कार्यवाही सुरू असल्याचे सांगण्यात आले आहे.

कार्यालयातील कोणतेही इलेक्ट्रिक साहित्य नादुरुस्त नसून, सर्व साहित्याचा योग्य प्रकारे वापर होत आहे. फर्निचरचे काम सुरू असल्यामुळे काही इलेक्ट्रिक बोर्डांच्या जागेत बदल करण्यात आल्याचेही खुलाशात नमूद करण्यात आले आहे.

दरम्यान, जिल्हा ग्रंथालय अधिकारी कार्यालय, धाराशिव या इमारतीची दुरवस्था झालेली नसल्याचे कार्यालयाकडून स्पष्ट करण्यात आले आहे. बांधकामाशी संबंधित सर्व समस्यांची माहिती सार्वजनिक बांधकाम विभागाला देण्यात आली असून, त्याबाबत आवश्यक कार्यवाही सुरू असल्याचे सांगण्यात आले.

नवीन ग्रंथांची खरेदी होत असल्याने त्यांची नोंद करण्याचे काम सुरू आहे. या कार्यालयात वर्षभर ग्रंथ येत असतात, असेही कार्यालयाने स्पष्ट केले आहे.

एकूणच, जिल्हा ग्रंथालय अधिकारी कार्यालयाच्या इमारतीची स्वच्छता, देखभाल, विद्युत व्यवस्था, फर्निचर तसेच बांधकामाशी संबंधित बाबींवर आवश्यक ती कार्यवाही सुरू असल्याचे या खुलाशातून स्पष्ट झाले आहे.

----------------------------

हिंदुस्थान समाचार / Hanumant Madanrao Chitnis