अमरावती, 15 सप्टेंबर (हिं.स.)। अंजनगाव सुर्जी तालुक्यातील काही भागांत वैद्यकीय उपचार करणाऱ्या व्यक्तींच्या शैक्षणिक पात्रतेबाबत तसेच उपचार केंद्रांच्या अधिकृततेबाबत नागरिकांकडून प्रश्न उपस्थित केले जात आहेत. काही ठिकाणी सलाईन लावणे, इंजेक्शन देणे, गोळ्या-औषधी साध्या कागदावर लिहून देणे आणि विविध आजारांवर उपचार केले जात असल्याची चर्चा असून, काही ठिकाणी उपचार केंद्रांना स्पष्ट फलक नसल्याचेही नागरिकांचे म्हणणे आहे. या पार्श्वभूमीवर संबंधित ठिकाणांची अधिकृत तपासणी करून वस्तुस्थिती स्पष्ट करावी, अशी मागणी जोर धरत आहे.

ग्रामीण भागातील नागरिकांसाठी जवळच्या ठिकाणी तातडीने उपचार मिळणे ही मोठी गरज असते. याच गरजेचा विचार करता तालुक्यातील सर्व उपचार केंद्रांची वैद्यकीय पात्रता, नोंदणी आणि आवश्यक परवानग्यांची नियमित पडताळणी होणे अपेक्षित आहे. मात्र, काही ठिकाणी उपचार करणाऱ्या व्यक्तींच्या पात्रतेबाबत स्पष्ट माहिती उपलब्ध नसल्याच्या तक्रारी असल्याने नागरिकांमध्ये संभ्रम निर्माण झाला आहे.

सलाईन आणि इंजेक्शनसारख्या उपचारांबाबतही नागरिकांकडून प्रश्न उपस्थित होत आहेत. अशा उपचारांसाठी संबंधित व्यक्तीकडे आवश्यक वैद्यकीय पात्रता व अधिकृत परवानगी आहे का, याची तपासणी होणे महत्त्वाचे आहे. चुकीचे निदान किंवा अयोग्य उपचार झाल्यास रुग्णांच्या आरोग्यावर परिणाम होऊ शकतो. त्यामुळे कोणावरही थेट आरोप करण्याऐवजी प्रशासनाने वस्तुनिष्ठ तपासणी करून सत्य परिस्थिती जनतेसमोर आणावी, अशी अपेक्षा व्यक्त होत आहे.

काही ठिकाणी बिना फलक किंवा उपचार केंद्राची स्पष्ट ओळख नसलेल्या ठिकाणी रुग्णांवर उपचार होत असल्याच्या चर्चेचीही नागरिकांनी दखल घेतली आहे. संबंधित ठिकाणी उपचार करणारी व्यक्ती कोण, तिची शैक्षणिक पात्रता काय, वैद्यकीय नोंदणी आहे का, उपचारासाठी आवश्यक परवानग्या आहेत का, तसेच औषधे व इंजेक्शनचा वापर नियमांनुसार होतो का, याची पडताळणी करण्याची मागणी करण्यात आली आहे.

आरोग्य विभागाने तालुक्यात विशेष तपासणी मोहीम राबवून खासगी दवाखाने, क्लिनिक व विविध उपचार केंद्रांची कागदपत्रे आणि वैद्यकीय पात्रता तपासावी, अशी नागरिकांची मागणी आहे. नियमांचे उल्लंघन आढळल्यास संबंधितांवर कायद्यानुसार कारवाई करावी; तर सर्व काही नियमानुसार असल्यास निर्माण झालेला संभ्रमही दूर करावा, अशी अपेक्षा नागरिक व्यक्त करीत आहेत. जनतेचे आरोग्य हा संवेदनशील विषय असल्याने तक्रारींची दखल घेऊन प्रशासनाने पारदर्शक तपासणी करणे गरजेचे आहे. केवळ तक्रारी आणि चर्चांपुरता विषय न राहता प्रत्यक्ष तपासणीतून सत्य समोर यावे, अशी नागरिकांची भूमिका आहे. दरम्यान, या सर्व बाबींची अधिकृत चौकशी झाल्यानंतरच नेमकी वस्तुस्थिती स्पष्ट होणार आहे. त्यामुळे आरोग्य विभाग या तक्रारींची किती गांभीर्याने दखल घेतो आणि तालुक्यात तपासणी मोहीम कधी राबवतो, याकडे नागरिकांचे लक्ष लागले आहे.

-----------------------------

हिंदुस्थान समाचार / अरुण जोशी