अमरावती, 17 एप्रिल (हिं.स.) भाजपच्या उमेदवार नवनीत राणा यांच्या उमेदवारीला शिवसेना शिंदे गटाचे नेते माजी खासदार आनंदराव अडसूळ यांनी विरोध केला आहे. या पार्श्वभूमीवर राणा दाम्पत्याने आनंदराव अडसूळ यांच्या येथील निवासस्थानी पोहचून त्यांचे पुत्र अभिजीत अडसूळ यांची भेट घेत मनधरणी करण्याचा प्रयत्न केला. कार्यकर्त्यांसोबत चर्चा करून पुढील निर्णय घेणार असल्याचे अभिजीत अडसूळ यांनी स्पष्ट केले.

महायुतीतील घटक असूनही आनंदराव अडसूळ आणि अभिजीत अडसूळ यांनी नवनीत राणा यांना तीव्र विरोध दर्शविला होता. अडसूळ आणि राणा यांच्यात गेल्या दशकभरापासून संघर्ष सुरू आहे. अडसूळ यांनीच नवनीत राणा यांच्या विरोधात जात प्रमाणपत्र प्रकरणी न्यायालयात याचिका दाखल केली होती. या प्रकरणी सर्वोच्च न्यायालयाने नुकताच निकाल दिला आहे.

दरम्यान, नवनीत राणा आणि आमदार रवी राणा हे बुधवारी सकाळी अभिजीत अडसूळ यांची भेट घेण्यासाठी त्यांच्या निवासस्थानी पोहचले. त्यावेळी आनंदराव अडसूळ हे उपस्थित नव्हते. अभिजीत अडसूळ आणि त्यांच्या पत्नीने राणा दाम्पत्याचे औक्षण करीत स्वागत केले. त्यांच्यात काही काळ चर्चाही झाली.राजकारणात कुणी कायमचा मित्र किंवा कायमचा शत्रू नसतो. पाहुणे घरी आले की, त्यांचे आपण स्वागत करतो. तसेच स्वागत आम्ही नवनीत राणा आणि रवी राणा यांचे केले आहे. मात्र, कार्यकर्त्यांसोबत चर्चा करून पुढील भूमिका स्पष्ट करणार असल्याचे अभिजीत अडसूळ यांनी सांगितले. पंतप्रधान नरेंद्र मोदी यांच्यासाठी ‘चारशे पार’चा नारा देण्यात आला आहे. त्यांना पुन्हा एकदा पंतप्रधान करण्यासाठी महायुतीतील सर्व घटक पक्ष एकत्रित काम करणार असल्याचे अभिजीत अडसूळ यांनी माध्यमांशी बोलताना सांगितले. महायुतीमधील सर्व घटक पक्ष एकत्रित काम करतात. त्यामुळे आम्ही एकत्रित काम करणार असल्याचे आमदार रवी राणा यांनी अडसूळ यांच्या भेटीनंतर सांगितले.

अडसूळ साहेबांचा आशीर्वाद घ्यायला आम्ही आलो आहे. आम्ही सर्व एकत्र आहे आणि एकत्र मिळून काम करू. जो राम को लाये है हम उनको लायेगे असे म्हणत मोदींचे हात बळकट करण्यासाठी आम्ही सोबत काम करू अशी प्रतिक्रिया रवी राणा यांनी दिली.दरम्यान राणा दाम्पत्याने आज भाजप आमदार प्रवीण पोटे यांच्या निवासस्थानी जाऊन त्यांची देखील भेट घेतली.

हिंदुस्थान समाचार