टोकियो, 22 ऑक्टोबर (हिं.स.)। अमेरिकेचे अध्यक्ष डोनाल्ड ट्रम्प पुढच्या आठवड्यात जपानच्या दौऱ्यावर जाणार आहेत. त्यापूर्वी जपानचे नवे परराष्ट्रमंत्री तोशीमित्सु मोतेगी यांनी ट्रम्प यांच्या दौऱ्याबाबत तयारी सुरू असल्याचे सांगितले आहे. बुधवारी (दि.२२) त्यांनी स्पष्ट केलं की, अमेरिकेचे अध्यक्ष डोनाल्ड ट्रम्प जेव्हा पुढच्या आठवड्यात टोकियोला येतील, तेव्हा जपान आपल्या संरक्षण क्षमतेला बळकटी देण्याची बांधिलकी संपूर्ण जगाला दाखवेल.

ट्रम्प २७ ते २९ ऑक्टोबर दरम्यान जपानच्या दौऱ्यावर असतील आणि या कालावधीत ते जपानच्या पहिल्या महिला पंतप्रधान सना ए ताकाइची यांची भेट घेतील, ज्यांनी नुकतेच मंगळवारी पदभार स्वीकारला आहे. ताकाइची यांना त्यांच्या कार्यकाळाच्या सुरुवातीलाच ट्रम्प यांचा दौरा आणि दोन प्रादेशिक परिषदांसारख्या मोठ्या राजनैतिक आव्हानांचा सामना करावा लागत आहे. परराष्ट्रमंत्री मोतेगी म्हणाले की, “आम्ही अध्यक्ष ट्रम्प यांच्या दौऱ्यासाठी संपूर्ण तयारी करत आहोत. ही भेट जपान-अमेरिका संबंध अधिक दृढ करण्याची संधी असेल.”

त्यांनी यावरही भर दिला की, जपान सध्या आपली पाच वर्षांची संरक्षण योजना (२०२३-२०२७) राबवत आहे, ज्याअंतर्गत संरक्षण खर्च जीडीपीच्या २% पर्यंत वाढवण्याचा निर्धार करण्यात आला आहे. यामध्ये लॉन्ग-रेंज क्षेपणास्त्रांसारख्या क्षमतांचा समावेश केला जात आहे, जो जपानच्या पारंपरिक “फक्त संरक्षण” या धोरणातून मोठा बदल मानला जातो.

मोतेगी यांनी हेही सांगितले की, ड्रोन आणि सायबर युद्धासारख्या नव्या धोक्यांना सामोरे जाण्यासाठी ही पावले उचलली जात आहेत. त्यांनी हेही स्पष्ट केले की जपानची संरक्षण नीती ही त्याच्या स्वतंत्र निर्णयांवर आधारित असेल, केवळ जीडीपीच्या टक्केवारीवर नव्हे.दुसरीकडे, अशी शक्यता व्यक्त केली जात आहे की, उजव्या विचारसरणीच्या जपान इनोव्हेशन पार्टीसोबत सत्तेत सहभागी झाल्यानंतर, पंतप्रधान ताकाइची यांच्या नेतृत्वाखाली जपान आणखी आक्रमक संरक्षण धोरण स्वीकारू शकतो.

दरम्यान, ट्रम्प आपल्या या दौऱ्यात जपानला संरक्षण खर्च जीडीपीच्या ५% पर्यंत वाढवण्याची, अमेरिकन शस्त्रास्त्रांची जास्त खरेदी करण्याची आणि जपानमध्ये तैनात ५०,००० अमेरिकन सैनिकांच्या खर्चात वाढ करण्याची मागणी करू शकतात.मोतेगी यांनी सांगितले की, ते लवकरच अमेरिकेचे परराष्ट्रमंत्री मार्को रुबियो यांची भेट घेऊन जपान-अमेरिका संरक्षण भागीदारी अधिक मजबूत करण्यावर चर्चा करतील. त्यांनी हेही सांगितले की, दोन्ही देशांमधील टॅरिफ करार प्रामाणिकपणे लागू करण्यात येईल आणि दोन्ही देशांच्या आर्थिक सुरक्षितता व विकासासाठी एकत्र काम केले जाईल.

---------------

हिंदुस्थान समाचार / Priyanka Bansode