वॉशिंग्टन , 4 नोव्हेंबर (हिं.स.)।अमेरिकेचे माजी उपराष्ट्राध्यक्ष डिक चेनी यांचे वयाच्या ८४व्या वर्षी निधन झाले आहे. माहितीनुसार, त्यांचा मृत्यू आरोग्याशी संबंधित गुंतागुंतींमुळे झाला. ते अनेक वर्षांपासून हृदयविकाराने त्रस्त होते आणि गेल्या काही वर्षांत त्यांना अनेक वेळा रुग्णालयात दाखल करण्यात आले होते.

डिक चेनी यांना अमेरिकेचे सर्वात शक्तिशाली उपराष्ट्राध्यक्ष मानले जात होते. त्यांनी २००१ ते २००९ या कालावधीत राष्ट्राध्यक्ष जॉर्ज डब्ल्यू. बुश यांच्यासोबत उपराष्ट्राध्यक्ष पद भूषवले होते. कठोर, निर्णायक आणि ठाम भूमिकेसाठी ते अमेरिकन राजकारणात ओळखले जात होते. चेनी यांनी इराक युद्ध आणि अमेरिकेच्या सुरक्षा धोरणाच्या निर्मितीत महत्त्वपूर्ण भूमिका बजावली होती. वायोमिंगचे माजी खासदार आणि अमेरिकेचे संरक्षण सचिव राहिलेले चेनी यांनी स्वतःला वॉशिंग्टनच्या सत्ताकेंद्रात एक प्रभावशाली व्यक्तिमत्त्व म्हणून स्थापित केले होते. अहवालानुसार, २००० च्या अध्यक्षीय निवडणुकीत जेव्हा बुश यांनी त्यांची उपराष्ट्राध्यक्षपदासाठी निवड केली, तेव्हा चेनी आधीच अमेरिकन सत्तासंरचनेतील एक अनुभवी आणि प्रभावी रणनीतीकार बनले होते. त्यांचा अनुभव आणि ठोस राजकीय दृष्टिकोन हा बुश प्रशासनाच्या धोरणांचा पाया ठरला.

२००१ ते २००९ दरम्यान उपराष्ट्राध्यक्ष म्हणून त्यांनी राष्ट्राध्यक्षपदाच्या अधिकारांना बळकटी देण्यासाठी महत्त्वाचे काम केले. वॉटरगेट प्रकरणानंतर जेव्हा रिचर्ड निक्सन यांना राजीनामा द्यावा लागला तेव्हा अमेरिकेच्या राष्ट्राध्यक्षपदाची शक्ती कमकुवत झाली होती असे त्यांना वाटत होते. निक्सन यांच्या प्रशासनातच चेनी यांनी आपल्या कारकिर्दीची सुरुवात केली होती. चेनी यांनी इराक युद्ध, दहशतवादविरोधी मोहिम आणि अमेरिकेच्या सुरक्षा धोरणाच्या आराखड्यात अशी भूमिका निभावली की, त्यांना अमेरिकेच्या इतिहासातील सर्वात निर्णायक पण वादग्रस्त उपराष्ट्राध्यक्षांपैकी एक म्हणून ओळखले जाते.

---------------

हिंदुस्थान समाचार / Priyanka Bansode