वॉशिंग्टन, 5 नोव्हेंबर (हिं.स.)।भारतीय वंशाचे डेमोक्रॅटिक पक्षाचे उमेदवार जोहरान ममदानी हे अमेरिकेतील न्यूयॉर्कचे महापौर म्हणून निवडून आले आहेत. त्यांनी महापौर निवडणुकीत उत्कृष्ट कामगिरी करत विजय मिळवला आहे. ममदानी हे मागील 100 वर्षांत न्यूयॉर्कचे सर्वात तरुण, पहिले भारतवंशी आणि मुस्लिम महापौर ठरले आहेत.

महत्त्वाचे म्हणजे, अमेरिकेचे राष्ट्राध्यक्ष डोनाल्ड ट्रम्प ममदानी यांच्या विजयाच्या विरोधात होते, परंतु आता ट्रम्प यांनाही मोठा धक्का बसला आहे. ममदानी वयाच्या केवळ 34 व्या वर्षी न्यूयॉर्क सिटीचे महापौर बनले आहेत. निवडणूकपूर्व सर्वेक्षणांमध्ये ते या पदासाठी सर्वाधिक लोकप्रिय उमेदवार म्हणून उदयास आले होते.

न्यूयॉर्क महापौर निवडणुकीत ममदानी यांच्यासोबत आणखी दोन उमेदवार मैदानात होते. न्यूयॉर्कचे माजी राज्यपाल अँड्र्यू क्युओमो हे अपक्ष म्हणून लढले होते. याशिवाय रिपब्लिकन पक्षाने कर्टिस स्लिवा यांना उमेदवारी दिली होती, मात्र क्युओमो आणि कर्टिस दोघांनाही निराशा हाती लागली. दोघेही सर्वेक्षणांमध्ये मागे होते.

ममदानी हे प्रसिद्ध चित्रपट निर्माती मीरा नायर यांचे पुत्र आहेत आणि ते स्वतःही एक रॅपर (संगीत कलाकार) राहिले आहेत. त्यांचा जन्म युगांडाच्या कंपाला येथे झाला होता, पण सातव्या वर्षी ते न्यूयॉर्कला आले आणि नंतर अमेरिकेचे नागरिक बनले.

अमेरिकेचे माजी राष्ट्राध्यक्ष बराक ओबामा यांनी ममदानी यांना विजयाबद्दल शुभेच्छा दिल्या आहेत. त्यांनी एक्सवर लिहिले, “विजय मिळवणाऱ्या सर्व डेमोक्रॅटिक उमेदवारांचे अभिनंदन. हे सिद्ध करते की जेव्हा आपण ताकदवान आणि दूरदर्शी नेत्यांसोबत उभे राहतो, जे लोकांच्या प्रश्नांची काळजी घेतात, तेव्हा आपण नक्कीच जिंकू शकतो. अजून खूप काम बाकी आहे, पण भविष्य आता अधिक उज्ज्वल दिसत आहे.”

जोहरान ममदानी हे त्यांच्या वादग्रस्त वक्तव्यांमुळे बराच चर्चेत राहिले आहेत. त्यांनी भारताचे पंतप्रधान नरेंद्र मोदी यांच्याविषयी देखील एक आक्षेपार्ह विधान केले होते.

---------------

हिंदुस्थान समाचार / Priyanka Bansode